Konqresdə erməni "soyqırımı" adlanan qətnaməyə baxmaqla Türkiyə-ABŞ münasibətlərini təhlükəyə məruz qoymağa dəyməz. Türkiyənin Baş naziri Rəcəb Tayyib Ərdoğan belə hesab edir. Bu barədə CNN Turk məlumat yayıb.
"Mən Türkiyə-Ermənistan münasibətlərinin normallaşmasını izləyən Prezident Obamanın sağlam düşüncəsinə ümid edirəm", - Ərdoğan deyib.
Onun sözlərinə görə, "soyqırım" məsələsinə siyasətçilər tərəfindən baxılmamalıdır, o, tarixçilər tərəfindən öyrənilməlidir.
ABŞ Konqresinin xarici əlaqələr komitəsinin sədri martın 4-də "erməni soyqırımı" haqqında qanunun müzakirəyə çıxarılmasını təklif edib.
Ermənistan və erməni lobbisi bildirir ki, Türkiyənin sələfi - Osmanlı imperiyası 1915-cı ildə Anadoluda yaşayan ermənilərə qarşı soyqırım həyata keçirib. Bu faktın bütün dünyada tanınmasını istəyən ermənilər dünya ölkələrində "soyqırım" təbliğatını gücləndirərək onun bəzi dövlətlərin parlamentləri tərəfindən tanınmasına nail olublar.