Bakı. Trend:
Azərbaycanda növbədənkənar Prezident seçkiləri Azərbaycan qanunvericiliyinə və bütün beynəlxalq demokratik normalara uyğun keçirilir.
Bunu Trend-ə MDB Parlamentlərarası Assambleyasının beynəlxalq müşahidəçilər qrupunun üzvü, Qırğız Respublikası Ali Şurasının hüquq qaydası, cinayətkarlıqla mübarizə və korrupsiya ilə mübarizə komitəsinin sədr müavini İsgəndər Matraimov bildirib.
"Səhər tezdən üç seçki məntəqəsində olduq və qeyd etmək istəyirik ki, seçki məntəqələrinin açılmasından əvvəl də yüksək fəallıq müşahidə olunub. Saat 12:00-dan sonra biz on iki məntəqəni gəzdik, burada onların hər birində ən gəncdən qocaya qədər müxtəlif yaşda olan seçicilərin növbələrini müşahidə etdik. Hər şey qanunla gedir, heç bir pozuntu görülmür", - İsgəndər Matraimov qeyd edib.
Qeyd edək ki, bu gün Azərbaycanda Prezident seçkiləri keçirilir. Prezident seçkilərində 7 nəfərin namizədliyi qeydə alınıb. Onlardan 5 nəfərin namizədliyi siyasi partiyalar tərəfindən, 2 nəfərin namizədliyi öz təşəbbüsü ilə irəli sürülüb. Yanvarın 9-da prezidentliyə namizədliyin qeydə alınması başa çatıb.
Seçici siyahılarında 6 milyon 478 min 623 seçicinin adı var. Onlar ölkə üzrə 6537 məntəqədə səs verəcəklər.
Seçkiləri izləmək üçün indiyə qədər 90 372 müşahidəçi qeydə alınıb. Onların 790 nəfəri 72 beynəlxalq təşkilatı təmsil edən müşahidəçilərdir. Bu müşahidəçilər 89 ölkədəndir.
Seçkilər bütün Azərbaycan ərazisini, o cümlədən, işğaldan azad edilmiş əraziləri əhatə edir. İşğaldan azad edilən ərazilərdə 26 seçki məntəqəsi yaradılıb.
Xaricdə olan Azərbaycan vətəndaşları üçün 37 ölkədə səfirlik və konsulluqlarda 49 seçki məntəqəsi yaradılıb. Həmin məntəqələrdə 23 mindən artıq seçici səsvermə hüququndan istifadə edəcək.
Seçkilərdə 190 beynəlxalq media qurumu iştirak edir. Onların 216 təmsilçisi beynəlxalq müşahidəçi kimi qeydə alınıb.
Səsvermə günü adı seçici siyahısında olan, amma məntəqələrə gəlmək imkanı olmayan seçicilərə Seçki Məcəlləsinin tələbinə görə daşınan qutu çatdırılacaq.