Şimali Kiprdə Azərbaycanın mədəniyyət günlərinin keçirilməsi məsələsi Azərbaycanın Mədəniyyət Nazirliyində müzakirə olunmur. Bu barədə Azərbaycanın mədəniyyət naziri Polad Bül-Bül oğlu Trend ə eksklüziv müsahibəsində bildirib.
O, Azərbaycanın Mədəniyyət Nazirliyinin nümayəndələrinin Şimali Kiprdə hər hansı bir tədbirin təşkil olunmasında iştirak etmələri barədə məlumatı təkzib edib.
"Bəzi yerli kütləvi informasiya vasitələri Mədəniyyət Nazirliyinin mətbuat xidmətinə istinad edərək Kiprdə Azərbaycanın mədəniyyət günlərinin keçirilməsi barədə yanlış məlumat yayıb. Bu məsələ mənim rəhbərlik etdiyim idarənin gündəliyinə daxil edilməyib", - deyə nazir vurğulayıb.
Eyni zamanda Polad Bül-Bül oğlu Azərbaycanın Mədəniyyət Nazirliyinin Şimali Kiprdə belə tədbirlərin keçirilməsinə hər zaman hazır olduğunu qeyd edib.