2006-cı ilin əvvəlindən Ermənistan-Azərbaycan, Dağlıq Qarabağ münaqişəsinin nizamlanması prosesində irəliləyişlər əldə etmək məqsədilə səylər artırılacaq. Bu barədə jurnalistlərlə söhbətində Azərbaycanın xarici işlər naziri Elmar Məmmədyarov bildirib.
Onun sözlərinə görə, artıq dekabrın 4-5-də Lyublyanada Azərbaycan və Ermənistanın XİN başçılarının görüşü ilə bağlı razılıq əldə olunsa da, onun formatı hələ razılaşdırılmayıb. "Ola bilsin ki, görüş ikilikdə keçsin, lakin danışıqların ATƏT-ə üzv ölkələrin XİN başçıları çərçivəsində aparılacağı istisna edilməyib. Lyublyanada baş tutacaq görüşdə ATƏT-in Minsk qrupu həmsədrləri də iştirak edəcəklər", - deyə nazir qeyd edib.
Danışıqlar prosesinin davam etdirilməsi məsələsinə gəldikdə E.Məmmədyarov bildirib ki, noyabrın 10-da həmsədrlər ATƏT-in Daimi Şurasının Vyanada keçirilmiş iclasında sülh danışıqlarının gedişinə dair məruzələrlə çıxış ediblər. Eyni zamanda XİN başçısı onu da əlavə edib ki, dekabrın ortalarına həmsədrlərin regiona səfəri nəzərdə tutulub.