Azərbaycan, Bakı, 04 dekabr / Trend , müxbir K.Zərbalıyeva/ Azərbaycanda inzibati mübahisələrə baxmaq üçün İnzibati-Prosessual Məcəllənin layihəsinə üçpilləli məhkəmə instansiyasının yaradılması barədə yeni fəsil əlavə edilib.
Milli Məclisin İnzibati və hərbi qanunvericilik şöbəsinin müdiri Səyyad Kərimov cümə axşamı Trend -a bildirib ki, layihəyə əlavə edilən fəsildə nəzərdə tutulub ki, inzibati mübahisələrə birinci instansiya məhkəməsi qismində regionlar üzrə yaradılan iqtisadi və inzibati mübahisələr üzrə məhkəmələr, apellyasiya və kassasiya instansiyaları qismində apellyasiya və Ali Məhkəmənin tərkibində İnzibati mübahisələrə dair işlər üzrə kollegiyalar baxacaq.
Şöbə müdirinin sözlərinə görə, gələcəkdə iqtisad məhkəmələrinin bazasında iqtisadi və inzibati mübahisələr üzrə məhkəmələr yaradılacaq. Həmin məhkəmələrə inzibati mübahisələrə baxmaq üçün xüsusi hakimlər təyin olunacaq.
Kərimov deyib ki, İnzibati-Prossesual Məcəllənin layihəsi yeni təkliflərlə Milli Məclisin yaz sessiyasının müzakirəsinə üçüncü oxunuşa çıxarılacaq və yaz sessiyasında Məcəllə tam qəbul olunacaq.
Şöbə müdiri bildirib ki, bu məhkəmələrlə bağlı konkret qərar qəbul ediləndən sonra, həmin məhkəmələrə hakimlərin seçilməsi, kadrlarla təmin olunma, həmin məhkəmələrə inzibati binaların ayrılması və digər bu kimi məsələlər 2009-cu ilin sonunadək həllini tapacaq.
Bu Məcəllə vətəndaş-məmur münasibətlərində yaranan mübahisələrin qısa zaman çərçivəsində çevik həll olunmasına imkan verəcək.
Ekspertlər hesab edirlər ki, inzibati məhkəmələrin fəaliyyətə başlaması digər məhkəmə instansiyalarına inzibati qərarlardan edilən şikayətlərin azalmasına, həmin məhkəmələrin iş yükünün aşağı düşməsinə səbəb olacaq.
Məqalə müəllifi ilə əlaqə ünvanı:[email protected]
