Bakı. Trend:
Siyasi sistemin və iqtisadiyyatın sabitliyi Azərbaycana investisiya cəlb etməkdə əsas amillərdən biridir.
Trend-in tədbirdəki müxbirinin verdiyi məlumata görə, bunu İxrac və İnvestisiyaların Təşviqi Agentliyinin (AZPROMO) icraçı direktoru Yusif Abdullayev 14-cü İslam İnkişaf Bankı Qrupu Özəl Sektor Forumunda bildirib.
Onun sözlərinə görə, Şərq və Qərbin kəsişməsində yerləşən Azərbaycan regiondakı çətin vəziyyətə baxmayaraq, tarazlığı və sabitliyi qoruyub saxlaya bilib.
"Sabit siyasi sistem və sabit iqtisadiyyat yoxdursa, investorlar ölkənizə gəlməyəcək. Buna görə də təhlükəsizlik və sabitlik məsələləri çox vacibdir. Son iki onillikdə ölkədə müasir infrastruktur yaradılıb və Ələt Azad İqtisadi Zonası və sənaye parkları şəbəkəsi də daxil olmaqla böyük layihələr həyata keçirilib", - deyə o bildirib.
O qeyd edib ki, Qarabağ on il müddətinə tam vergi güzəşti olan ərazi elan edilib.
"Naxçıvan Muxtar Respublikasında da xarici və yerli investorlar üçün oxşar vergi güzəştləri mövcuddur. Hazırda 25-26 sentyabr tarixlərində Formula 1 yarışı ilə eyni vaxtda Bakıda keçiriləcək ikinci Azərbaycan Beynəlxalq İnvestisiya Forumuna hazırlıq işləri aparılır. Bu cür beynəlxalq tədbirlər vasitəsilə biz ölkənin nailiyyətlərini nümayiş etdirir və investorlar üçün imkanları vurğulayırıq. Bu, Azərbaycanın biznes və investisiya üçün cəlbedici bir məkan kimi imicini gücləndirməyə kömək edir", - deyə Y. Abdullayev bildirib.
Eyni zamanda, AZPROMO-nun icraçı direktoru investisiya cəlbedici layihələrin inkişaf etdirilməsinin kapital cəlb etmək üçün əsas problem olaraq qaldığını vurğulayıb.
"Banklara yararlı, investisiyaya hazır layihələrin olmaması bir çox ölkə üçün böyük bir problemdir. Bu cür layihələr nə qədər çox olarsa, dünyanın hər yerindən investorları cəlb etmək imkanı bir o qədər çox olar.
Azərbaycan rəhbərliyi ölkəni təkcə biznes üçün deyil, həm də həyat üçün cəlbedici edən əlverişli investisiya mühiti yaratmağa nail olub", - deyə o bildirib.
