Azərbaycan, Bakı, 28 iyun /Trend, müxbir M.Əliyev/
Bakıda cümə axşamı "Rusiya-Azərbaycan Dialoqu 2012" üçüncü Rusiya-Azərbaycan regionlararası forumu öz işinə başlayıb.
Trend-in məlumatına görə, forumun açılışında çıxış edən Milli Məclisin İqtisadi siyasət komitəsinin sədri Ziyad Səmədzadə bildirib ki, forum çərçivəsində səsləndiriləcək təkliflər iki ölkə arasında sosial-iqtisadi əlaqələrin inkişaf etdirilməsinə səbəb olacaq.
"Hər forum Azərbaycan və Rusiya arasında strateji əlaqələri yeni səviyyəyə yüksəldir", - o deyib.
Səmədzadə bildirib ki, forumda qloballaşan dünyada hər bir ölkə üçün fundamental əhəmiyyət kəsb edən məsələlər müzakirə ediləcək.
"Forumda regionlararası əməkdaşlıq, bank siyasəti, pul-kredit siyasəti, investisiya siyasəti, humanitar sahədə əməkdaşlığın hazırkı səviyyəsi və inkişafı perspektivləri müzakirə mövzusu olacaq", - o deyib.
Forumun açılışında Prezident Administrasiyasının rəhbəri Ramiz Mehdiyev Azərbaycan Prezidenti İlham Əliyevin forum iştirakçılarına təbrik məktubunu oxuyub.
