Azərbaycan, Bakı, 24 iyul / Trend , müxbir Ü.İsmayılova, İ.Хəlilova /
"Azərbaycanın ən böyük sığorta şirkətlərindən biri - Az Sigorta ilin sonuna qədər 13-15 milyon manat həcmində haqq yığmaq fikrindədir", - şirkətin İdarə Heyətinin sədri Xəyal Məmmədxanlı deyib.
"2010-cu ilin yekunlarına görə biz 24-25 milyon manat sığorta haqqı həcmi ilə bazarda lider mövqedə qərarlaşmalıyıq", - Məmmədxanlı bildirib.
Onun sözlərinə görə, şirkətin ilin birinci yarısı üzrə fəaliyyətinin yekunları bu proqnozlara uyğundur və altı milyon manat təşkil edir.
Məmmədxanlı deyib ki, şirkət 2008-ci ilin yekunlarına əsasən, 15 milyon manat yığmaq fikrində olsa da, qlobal maliyyə böhranının təsiri bu prosesi bir qədər zəiflədib.
Azərbaycan Maliyyə Nazirliyinin məlumatına görə, 2008-ci ilin yekunlarına əsasən, Az Sigorta 9,59 milyon manat haqq toplayıb. Şirkətin ödəmələri 2,32 milyon manat təşkil edib.
Az Sigorta ölkənin sığorta bazarında 2006-cı ilin noyabr ayının 22-dən etibarən fəaliyyət göstərir. Hazırda ölkənin müxtəlif regionlarında şirkətin 8 filialı, həmçinin 40 regional nümayəndəliyi fəaliyyət göstərir. Az Sigorta üçü icbari olmaqla, 28 növ sığorta xidməti göstərir. İlin birinci yarısının nəticələrinə görə, şirkətin haqları 5,56 milyon manat, ödəmələri 1,95 milyon manat təşkil edib.
İyulun 24-nə olan rəsmi məzənnə 0,8042 AZN/USD təşkil edir.
Məqalə müəllifi ilə əlaqə ünvanı: [email protected]
