Azərbaycan, Bakı, 11 iyun /Trend, müxbir E.İsmayılov/
Ötən şənbə günü Bakı-Moskva marşrutu ilə hərəkət edən təyyarənin Həştərxan aeroportunda təcili eniş etməsinə səbəb hava gəmisinin hər iki tərəfinə yanacağın qeyri-bərabər paylanması olub. Bu barədə bazar ertəsi Trend-ə "YuTeyr" aviaşirkətinin Bakı nümayəndəliyindən bildiriblər.
Məlumata görə, Həştərxandan sərnişinlər elə həmin təyyarə ilə Moskvanın "Vnukovo" aeroportuna göndəriliblər.
"Həştərxan aeroportunda təcili eniş etmənin səbəbi hava gəmisinin hər iki tərəfinə yanacağın qeyri-bərabər paylanması olub. Dünən təyyarə sərnişinlərlə Moskvaya yola düşüb", - nümayəndəlikdən deyiblər.
Bir az əvvəl "İnterfaks-Cənub" agentliyinin verdiyi məlumata görə, ötən şənbə günü "YuTeyr" aviaşirkətinə məxsus təyyarə Moskva vaxtı ilə saat 18:00-da Həştərxanda təcili eniş edib.
Təyyarənin göyərtəsində 54 sərnişin olub.