Kənd Təsərrüfatı Nazirliyinin yanında Fitosanitar nəzarət üzrə dövlət xidmətinin Bitkilərin müdafiəsi mərkəzi 2007-ci il üçün xüsusi təhlükəli karantin zərərvericilərlə mübarizə çərçivəsində preparatların satın alınması üçün tender elan edib. Bu barədə Trend mərkəzə istinadən xəbər verir.
Tender iki lot üzrə keçirilir: inteksisidlərin -herbisidlərin və rodentisidlərin satın alınması. Terderdə iştirakla maraqlanan şəxslər aprelin 17-dən gec olmayaraq, müvafiq sənədləri təqdim etməlidirlər, tender təkliflərinin olduğu paketlər aprelin 18-də mərkəzdə açılacaq.
Alınmış kimyəvi preparatlar 2007-ci ilin oktyabr ayına qədər fitosanitar xidmətə təqdim olunmalıdırlar.
Xüsusilə çəyirtkə, Kaliforniya kəpənəkləri, müxtəlif növ tırtıllar səpin və məhsul yığımı prosesində əmələ gəldiklərindən, nazirlik bu tədbirləri hər il keçirir.
2006-cı ildə mərkəz Türkiyənin "Koruma Klor Alkali" və Rusiyanın "Ximindustriya" şirkətindən 170 min manatdan çox məbləğdə 9 ton insektisid, 1 ton herbisid və 8 ton rodentisid alıb. Bu rəqəm 2005-ci ildə 250 min manat təşkil edib.