Azərbaycan, Bakı, 10 mart / Trend , müxbir S.Əliyev/
2030-cu ilədək Azərbaycanın nəqliyyat sektoru tərəfindən TRACECA nəqliyyat dəhlizinə daxil olmayan ölkələrlə xarici ticarət üzrə daşımaların həcmi 2007-ci lin göstəricisinə nisbətdə 500 faiz artacaq. Bu barədə TRACECA-nın Nəqliyyat və Ticarət Atlasında deyilir. Atlas "MDB ölkələrinin nəqliyyat sektorunda tədrisin keyfiyyətinin artırılması (TRACECA)" layihəsi çərçivəsində Niderlandın NEA şirkəti tərəfindən hazırlanıb.
NEA-nın məlumatına görə, 2007-ci ildə Azərbaycanın TRACECA-nın hüdudlarından kənardakı ölkələrlə ticarətində birinci yeri xam neft tutub. Daşımaların həcmi 12 milyon tondan çox olub.
Araşdırmada qeyd olunur ki, 2030-cu ilədək xam neftin həcminin 30 milyon ton təşkil edəcəyi gözlənilir. Bu, əsasən ixraca aiddir.
Proqnozlara görə, 2030-cu ilədək neft məhsulları daşımaların həcminə görə ikinci yeri tutacaq və 2007-ci ildə olan iki milyon tonla müqayisədə təxminən 9 milyon ton təşkil edəcək.
Ən yüksək göstərici maşın, nəqliyyat avadanlığı, müxtəlif sənaye məmulatlarının daşınması sahələrində gözlənilir. Bu, 2030-cu ilədək təxminən 480 faiz təşkil edəcək.
2007-ci ildə TRACECA ölkələri ilə ticarətdə neft məhsullarının həcmi 1,5 milyon ton təşkil edib, əsasən ixrac üçün sürtkü materiallarından ibarət olub.
2007-ci ildən 2030-cu ilədək olan dövrdə artım təxminən 300 faiz dəyərləndirilir. Bu o deməkdir ki, 2030-cu ilədək həcm 6,3 milyon tonadək artacaq.
