BTC Co boru kəməri şirkəti Ceyhan limanında ilk tankerin 85 min ton dedveyt ilə doldurulması üçün lazım olan həcmdə çənlərin Azərbaycan nefti ilə doldurulmasını tamamlayıb. Bu barədə Trend ə Türkiyənin Energetika və təbii sərvətlər nazirliyindən xəbər veriblər.
Güman edilir ki, The British Hawtharne tankerinin Ceyhanda neftlə doldurulmasına 2 iyunda başlanacaq. BTC boru kəməri ilə çatdırılmış neftin birinci partiyasını Amerikanın ExxonMobil şirkəti alıb.
Türkiyə KİV-lərinin məlumatına görə, 31 mayda Ankarada Türkiyənin Energetika və təbii sərvətlər naziri Hilmi Gülərlə BOTAS BTC rəhbərliyi və Türkiyə jandarmeriyasının və sahil mühafizəsinin nümayəndələri arasında görüş keçirilib. Bu görüşdə Bakı-Tbilisi-Ceyhan boru kəmərinin mühafizəsi üzrə təhlükəsizlik tədbirlərinin gücləndirilməsi məsələləri müzakirə olunub.