Bakı. Trend:
80 sərnişini daşıyan bərə Egey dənizi sahilində İzmir yaxınlığında sahilə çıxaraq quruya çırpılıb.
Trend TRT Haber telekanalına istinadən xəbər verir ki, itki yoxdur, hadisəyə səbəb gəmi kapitanının qəfil huşunu itirməsi olub.
Bərə axşam saatlarında İzmirin Konak və Bostancı bölgələri arasında fəaliyyət göstərib. Sahildən 100 m aralıda marşrutun qəfil dəyişməsi gəmidə panikaya səbəb olub. Təcili yardım maşınları təcili olaraq qəza yerinə göndərilib. Həkimlərin sözlərinə görə, sərnişinlərdən heç biri xəsarət almayıb.
Bərə sərnişinləri başqa gəmiyə köçürülüb, kapitana tibbi yardım göstərilib. Sahil Mühafizəsi qüvvələri bərənin yenidən suya salınması üçün çalışır, gəminin burnu sahildə yerləşir və zədələnib.