Bakı. Trend:
İsrail Hərbi Hava Qüvvələrinin Qəzza şəhərindəki Əl-Tabain məktəbinə endirdiyi hava zərbəsi nəticəsində ölənlərin sayı 8 nəfərə çatıb.
Trend-in “Əl-Cəzirə” telekanalına istinadən verdiyi məlumata görə, hücum zamanı həyatını itirənlər arasında üç uşaq da var. Hadisə nəticəsində bir neçə yaralı olduğu bildirilsə də, onların dəqiq sayı hələlik açıqlanmayıb.
Əvvəlki məlumatlara əsasən, hücumda 6 fələstinli həlak olmuşdu. İsrail Müdafiə Qüvvələri isə hücumun səbəbini izah edərək, məktəb binasında HƏMAS hərəkatının snayperinin gizləndiyi barədə kəşfiyyat məlumatı əldə etdiklərini və onu məhv etdiklərini bəyan edib.
İsrail ordusunun mətbuat xidməti açıqlamasında bildirib ki, hərbi əməliyyat zamanı mülki şəxslərin təhlükəsizliyini təmin etmək üçün “bütün lazımi tədbirlər” görülüb. Buna baxmayaraq, məktəbə endirilən zərbə fələstinli mülki əhalinin daha çox itki verməsinə səbəb olub.