Bakı. Trend:
Sağçı Liberal Partiyasının namizədi, senator Flavio Bolsonaro prezident seçkilərinin ikinci turunda qələbə qazanacağına tam əmin olduğunu bildirib və ölkədə sol qüvvələrin uzun illər davam edən dominantlığının başa çatdığını bəyan edib.
“Bu, Əməkçilər Partiyasının dövrünün sonu və ölkəmizdə dəyişikliklərin başlanğıcıdır. Cəmi üç həftədən sonra Braziliyanın öz gələcəyi ilə bağlı qəti cavab verəcək olmasından inanılmaz dərəcədə xoşbəxtəm”, – deyə siyasətçi vurğulayıb.
Respublikanın keçmiş prezidenti Jair Bolsonaronun oğlu “təmiz seçki kampaniyası” aparacağına söz verib və xatırladıb ki, dövlət başçısı vəzifəsinə yenidən seçilmə institutunun ləğvini rəsmi şəkildə öhdəsinə götürən prezidentliyə yeganə namizəddir.
Oktyabrın 4-də keçirilən seçkilərin birinci turunda Flavio Bolsonaro 47 faizdən çox səs toplayaraq qalib gəlib və ölkənin hazırkı prezidenti Luis İnasio Lula da Silvanı demək olar ki, 2 faiz bəndi qabaqlayıb. Həlledici ikinci tur oktyabrın 25-də keçiriləcək. Bununla yanaşı, dövlət başçısı Lula da Silva birinci turun nəticələri açıqlanandan sonra bildirib ki, ikinci turda qələbə qazanmaq üçün seçki kampaniyasına yenidən başlayacaq.
