Bakı. Trend:
Yaponiya hökuməti ABŞ-dan ölkədə yerləşdirilən amerikalı hərbçilərin intizamının gücləndirilməsini tələb edəcək və onların iştirakı ilə insidentlərin baş verməsinin qarşısını almaq üçün mümkün olan bütün tədbirlərin görülməsində israr edəcək.
Bunu Yaponiyanın Nazirlər Kabinetinin baş katibi Minoru Kihara ölkənin cənubundakı Okinava prefekturasının sakininin öldürülməsini şərh edərkən bildirib. Həmin cinayəti törətməkdə şübhəli bilinən ABŞ dəniz piyadası saxlanılıb.
“Yaponiya hökuməti ABŞ-nin Yaponiyadakı hərbi qüvvələrində intizamın gücləndirilməsində və onların iştirakı ilə baş verən insidentlərin təkrarlanmasının qarşısının alınmasında israr etməkdə davam edəcək”, – deyə o qeyd edib. Kihara vurğulayıb ki, ABŞ hərbçilərinin iştirakı ilə baş verən insidentlər “yerli sakinlər arasında böyük narazılıq və narahatlıq doğurur və yolverilməzdir”. Yaponiya hökumətinin baş katibi həmçinin bildirib ki, hökumət bu cür insidentlərin qarşısının alınması, eləcə də ABŞ hərbi obyektlərinin, ilk növbədə Okinavadakı bazaların yerli sakinlər üçün yaratdığı yükün azaldılması məsələlərində ABŞ ilə sıx əməkdaşlığı davam etdirəcək.
Bundan əvvəl Yaponiyanın cənubundakı Okinava prefekturasının polisi yerli sakini qarət etməkdə və öldürməkdə şübhəli bilinən 20 yaşlı ABŞ dəniz piyadasını həbs edib. Bildirilib ki, hərbçi Okinavada yerləşən ABŞ Dəniz Piyadaları Korpusunun Futenma aviabazasına təyin olunub. Polisin məlumatına görə, 39 yaşlı yerli sakinin meyiti yerli otellərdən birinin otağında aşkarlanıb. Müşahidə kameralarının görüntülərində saxlanılan şəxsin öldürülən qadınla birlikdə otağa daxil olduğu, bir müddət sonra isə otaqdan tək çıxdığı görünür. Həmçinin bildirilir ki, mərhumun şəxsi əşyaları da itib. Yaponiya KİV-in məlumatına görə, hərbçi dindirmə zamanı təqsirini tamamilə inkar edib.
İnsidentlə əlaqədar Yaponiyanın xarici işlər naziri Tosimitsu Motegi ABŞ-nin Tokiodakı səfiri Corc Qlassı çağıraraq ona etirazını bildirib. Bundan əvvəl Yaponiya müdafiə naziri Şinjiro Koizumi də insidentlə bağlı ABŞ hərbi komandanlığına etiraz edildiyini açıqlayıb. O vurğulayıb ki, hadisə “tamamilə hiddətləndirici və bağışlanmazdır”.
ABŞ Dəniz Piyadaları Korpusunun Okinavadakı bölməsi isə yaydığı bəyanatda “həlak olan qadının ailəsinə dərin hüznünü” ifadə edib və baş verənlərə “son dərəcə ciddi yanaşdığını”, habelə istintaqın aparılmasında Yaponiya hakimiyyətinə yardım göstərdiyini vurğulayıb.
Yaponiyanın iri adalarının ən cənubunda yerləşən Okinavada ABŞ-nin ölkə ərazisindəki bütün hərbi obyektlərinin sahəsinin 70 faizindən çoxu cəmləşib. Burada ABŞ hüdudlarından kənarda yerləşən ən böyük ABŞ Hərbi Hava Qüvvələri bazası olan Kadena aviabazası da yerləşir.
