Bakı.Trend:
2026-cı ildə Böyük Britaniyada ev heyvanları, o cümlədən iribuynuzlu mal-qara üçün təhlükəli olan, qızdırma və şişkinliyə səbəb olmaqla yanaşı, selikli qişaları zədələyən virus infeksiyası – göy dil xəstəliyinin (blutong) yayılması qeydə alınıb.
Bu barədə “The Guardian” qəzeti məlumat yayıb.
“Britaniyalı fermerlər göy dil xəstəliyinin tarixdəki ən ağır mövsümünü yaşayırlar”, – məlumatda deyilir.
Qeyd olunur ki, 2026-cı ilin iyul ayının əvvəlindən etibarən göy dil xəstəliyinə 2 mindən çox yoluxma halı qeydə alınıb. Onların yarıdan çoxu sentyabr ayında aşkarlanıb.
Bildirilir ki, əsasən Afrikada yayılan virus ilk dəfə 2023-cü ildə Böyük Britaniyada aşkarlanıb. Nəşrin məlumatına görə, xəstəliyin yayılması iqlim dəyişikliyi və göy dil virusunu mal-qaraya keçirən ağcaqanadların çoxalması ilə əlaqələndirilir. Bu xəstəlik insanlar üçün təhlükə yaratmır.
