Bakı. Trend:
Cənubi Koreya Şimali Koreyanı şənbə günü ən azı bir ballistik raket buraxmaqda ittiham edib.
Bu barədə Cənubi Koreya ordusu məlumat verib.
“Silahlı qüvvələrimiz Şimali Koreyanın Von-san bölgəsindən Şərq dənizi istiqamətində buraxılan ballistik raket aşkarlayıb”, – deyə Seulun Birləşmiş Qərargah Rəisləri Komitəsi Yaponiya dənizinin Koreyaca adından istifadə edərək bildirib.
Bu yeni raket buraxılışı Şimali Koreya ilə Cənubi Koreya arasında gərginliyin yenidən artdığı bir vaxta təsadüf edib. Cənubi Koreya bundan əvvəl qonşu ölkəni iki ölkəni ayıran Demilitarizasiya Zonasının özünə düşən hissəsində minalar yerləşdirməkdə ittiham edib. Həmin partlayıcı qurğulardan ikisinin partlaması nəticəsində sentyabrın 21-də üç Cənubi Koreya hərbçisi yaralanıb.
Seul 1953-cü ildə Koreya müharibəsinə son qoyan atəşkəs sazişinin pozulması kimi qiymətləndirdiyi bu insidentlə əlaqədar Pxenyandan üzr istəməsini tələb edib. Şimali Koreya isə insidentə görə hər hansı məsuliyyət daşıdığını inkar edib və Seulun “acınacaqlı” adlandırdığı üzr tələbini rədd edib.
Şimali Koreya nüvə silahı və raket proqramlarına görə Birləşmiş Millətlər Təşkilatının ağır sanksiyalarına məruz qalır. Pxenyan bu proqramları ABŞ-nin hər hansı işğal və ya onun rejimini devirmək cəhdinə qarşı “sığorta” hesab edir.
