Bakı. Trend:
Türkiyə Türk dünyasının bəşəri, iqtisadi və strateji potensialını ortaq rifaha çevirmək fəaliyyətini davam etdirəcək.
Bu fikirlər Türkiyə Xarici İşlər Nazirliyinin 3 oktyabr – Türk Dövlətlərinin Əməkdaşlıq Günü münasibətilə yaydığı açıqlamada bildirilib.
Qeyd edilib ki, Türk Dövlətləri Təşkilatının əsasını qoyan Naxçıvan Sazişinin imzalanmasının 17-ci ildönümü qeyd olunur.
Vurğulanıb ki, ortaq tarix, dil və köklü qardaşlıq əlaqələrindən güc alan Türk Dövlətləri Təşkilatı həmrəyliyi institusionallaşdıran və əməkdaşlığı möhkəmləndirən mühüm platformaya çevrilib.
Bildirilib ki, Türk Dövlətləri Təşkilatının 13-cü Zirvə görüşü oktyabrın 29-30-da Türkiyənin ev sahibliyi ilə keçiriləcək.
“Türkiyə Türk dünyasının bəşəri, iqtisadi və strateji potensialını ortaq rifaha çevirmək və Türk Əsrini birlik və həmrəylik içində qurmaq məqsədilə fəaliyyətini davam etdirəcək”, - deyə açıqlamada əlavə edilib.
Türk Devletleri Teşkilatı’nın temellerini atan Nahçıvan Anlaşması’nın 17. yıldönümünde, Türk Devletleri İşbirliği Günü’nü gurur ve coşkuyla kutluyoruz!
— T.C. Dışişleri Bakanlığı (@TC_Disisleri) October 3, 2026
Ortak tarihimizden, dilimizden ve köklü kardeşlik bağlarımızdan aldığımız güçle, Türk Devletlerinin sahip olduğu beşerî,… pic.twitter.com/u3REJud9af
Türk Dövlətlərinin Əməkdaşlıq Günü və Türk Dövlətləri Təşkilatı
Qeyd edək ki, Türk Dövlətlərinin Əməkdaşlıq Günü hər il oktyabrın 3-də qeyd olunur. Bu tarix 2009-cu il oktyabrın 3-də Naxçıvanda Azərbaycan, Türkiyə, Qazaxıstan və Qırğızıstan arasında imzalanmış Naxçıvan Sazişi ilə bağlıdır. Həmin saziş türk dövlətləri arasında əməkdaşlığın institusional əsaslarının möhkəmləndirilməsi və Türk Dövlətləri Təşkilatının yaradılması istiqamətində mühüm mərhələ olub.
Türk Dövlətləri Təşkilatı (TDT) türk dövlətləri arasında hərtərəfli əməkdaşlığı inkişaf etdirmək məqsədi daşıyan hökumətlərarası beynəlxalq təşkilatdır. Təşkilatın əvvəlki adı Türkdilli Ölkələrin Əməkdaşlıq Şurası olub. 2021-ci ildə İstanbulda keçirilən sammitdə təşkilatın adının Türk Dövlətləri Təşkilatı olaraq dəyişdirilməsi qərara alınıb.
Təşkilatın hazırda beş üzv dövləti var: Azərbaycan, Türkiyə, Qazaxıstan, Qırğızıstan və Özbəkistan. Macarıstan, Türkmənistan və Şimali Kipr Türk Respublikası isə müşahidəçi statusuna malikdir. TDT çərçivəsində siyasi dialoq, iqtisadiyyat, ticarət, nəqliyyat, enerji, təhsil, mədəniyyət, turizm, rəqəmsallaşma və təhlükəsizlik daxil olmaqla, müxtəlif sahələrdə əməkdaşlıq həyata keçirilir. Təşkilatın əsas qərarverici orqanı Dövlət Başçıları Şurasıdır, Katibliyi isə İstanbul şəhərində yerləşir.
