Bakı. Trend:
Portuqaliya milli komandasının baş məşqçisi Jorje Jezuş yığmada çıxış edən hücumçu Kriştiano Ronaldo ilə bağlı planlarından danışıb.
“Mən nə baş verəcəyini bilmirəm. Bildiyim qədərilə, hər şey açıqdır. Kriştiano öz həyatına özü qərar verir. Əgər Ronaldo növbəti çağırış zamanı milli komandaya qoşulmaq istəsə, niyə də olmasın? İnciklik? Heç nə yoxdur, bu, anlaşılmazlıq idi. Məncə, bunu asanlıqla yoluna qoymaq olar. Nə vaxt həll edəcəyəm? Bilmirəm. Oyun başa çatıb və yalnız bundan sonra hər şeyin necə nəticələnəcəyini öyrənəcəyik.
Mən onunla danışmamışam. Bu, əslində, düzgün həll olunmamış məsələ idi, ortada heç bir problem yox idi. Bu, heç nədən yaranan və sonda baş verənlərə gətirib çıxaran bir problem idi. Mən milli komandanın məşqçisi, baş məşqçisiyəm. Mən bütöv bir sistemin bir hissəsiyəm. Əgər hər kəs milli komanda üçün, öz fikrincə, daha yaxşı olanı bölüşmək istəyirsə, mən hər şeyə açığam.
Milli komandaya ilk çağırışdan əvvəl biz ünsiyyətdə olmuşuq və əgər onun marağı varsa, ikinci çağırış zamanı yenidən danışacağıq. Mən Kriştiano ilə bir il işləmişəm. Aramızda çox möhkəm peşəkar dostluq münasibəti var”, – deyə Jezuşun sözlərini Record nəşri sitat gətirir.
Ronaldo baş məşqçi Jorje Jezuşun aralarında heç bir münaqişənin olmadığını bildirməsinə baxmayaraq, Millətlər Liqasının 3-cü turunda Danimarka ilə keçiriləcək matçdan (4:2) əvvəl milli komandanın düşərgəsini tərk edib. Portuqaliya KİV-lərinin bir qismi Ronaldonun milli komandadakı karyerasını başa vurmaq niyyətində olduğunu bildirib. Həmçinin Jezuşun hücumçu ilə barışıq görüşünə razılıq verdiyi və futbolçunu noyabrda keçiriləcək oyunlar üçün heyətə daxil etmək niyyətində olduğu barədə məlumat yayılıb.
