Bakı. Trend:
ABŞ Hərbi Dəniz Qüvvələri İrana qarşı dəniz blokadasının bərpa edilməsindən bəri bu ölkə ilə əlaqəli, İran limanlarına gedən və ya oradan çıxan 130 ticarət gəmisinin qarşısını alıb.
Bu barədə ABŞ Silahlı Qüvvələrinin Yaxın Şərq üzrə Mərkəzi Komandanlığı (CENTCOM) məlumat yayıb.
“Oktyabrın 5-nə olan məlumata görə, Mərkəzi Komandanlığın qüvvələri ABŞ tərəfindən İrana qarşı tətbiq edilən qüvvədə olan dəniz blokadasının ciddi şəkildə təmin edilməsi çərçivəsində 130 kommersiya gəmisinin istiqamətini dəyişdirib”, - deyə məlumatda bildirilib.
“ABŞ Silahlı Qüvvələri bu vəzifəyə ən yüksək prioritet verir. Blokadanı yarmağa cəhd edən istənilən gəmi ilə bağlı qətiyyətlə və dərhal hərəkət edəcəyik”, - deyə CENTCOM-un komandanı admiral Bred Kuper bildirib. O əlavə edib ki, ABŞ qüvvələri “yüksək hazırlıq səviyyəsi, peşəkarlığı və güclü döyüş imkanları ilə seçilir”.
