Bakı. Trend:
Bir saat öncə İranın cənub-şərqində yerləşən Sistan və Bəluçestan vilayətinin Bəmpur rayonunda silahlı qarşıdurma nəticəsində 2 polis əməkdaşı öldürülüb və 1 polis yaralanıb.
Bununla əlaqədar İranın Sistan və Bəluçestan vilayəti polis idarəsi məlumat yayıb.
Məlumatda qeyd olunur ki, Bəmpur-İranşəhr rayonları arasında reyd keçirən polis əməkdaşlarına qarşı naməlum silahlılar odlu silahlardan atəş açıblar. Hadisə nəticəsində 1 serjant-mayor, 1 çavuş ölüb, 1 polis əməkdaşı isə yaralanıb. Naməlum silahlılar hadisə yerindən qaçıblar.
Naməlum silahlıların tapılması üçün axtarış-əməliyyat tədbirləri davam etdirilir.
Qeyd edək ki, İranın Sistan və Bəluçestan vilayətində müxtəlif zaman kəsiyində silahlı insidentlər qeydə alınır. Bu vilayətdə Ceyşül-Ədl qruplaşması ara-sıra aktlar həyata keçirir.
Əlavə edək ki, İranda bu həftə “Hüquq-Mühafizə Qüvvələri” həftəsi adlandırılır.
