Bakı.Trend:
Xəzər və Qara dəniz "yaşıl enerji" dəhlizlərinin inteqrasiyası planlaşdırılır.
Bu barədə Trend-ə Qazaxıstanın elektrik şəbəkələrinin idarə olunması üzrə milli şirkətdən (KEGOC) bildirilib.
“Xəzər marşrutunun “Black Sea Energy Cable” layihəsi ilə vahid təchizat zənciri kimi inteqrasiyası, “yaşıl” elektrik enerjisinin Avropa ölkələrinə çatdırılması planlaşdırılır. Qazaxıstan və regiondakı tərəfdaşlar layihələrin qrafiklərinin və texniki parametrlərinin sinxronlaşdırılması ilə bağlı danışıqlar aparır, Mərkəzi Asiya enerjisinin Aİ bazarına çıxarılması üçün infrastrukturun birləşdirilməsi istiqamətində birgə işi davam etdirirlər”, - deyə şirkətdən bildirilib.
KEGOC-da əlavə ediblər ki, Xəzər Yaşıl Enerji Dəhlizinin ilkin texniki-iqtisadi əsaslandırmasının hazırlanmasını İtaliyanın CESI S.P.A. şirkəti həyata keçirir. Tədqiqatın birinci mərhələsinin 2027-ci ilin mayında başa çatdırılması planlaşdırılır.
“Hazırda məsləhətçi ssenari modelləşdirilməsi, enerji sistemlərinin dayanıqlığının qiymətləndirilməsi və layihənin həyata keçirilməsi üçün optimal texniki həllərin müəyyənləşdirilməsini əhatə edən ilkin tədqiqatlar kompleksini aparır”, - deyə şirkətdən bildirilib.
KEGOC qeyd edib ki, elektrik enerjisinin tədarükü bərpa olunan enerji mənbələri hesabına yeni generasiya güclərinin istifadəyə verilməsi ilə təmin olunacaq.
“Çevirici yarımstansiyaların və 350-400 kilometr uzunluğunda sualtı kabelin tikintisi milli dəyişən cərəyan şəbəkələrinin dayanıqlığı üçün risk yaratmadan “yaşıl enerji"nin idarəolunan ötürülməsinə imkan verəcək. Bununla paralel olaraq, iştirakçı ölkələrin elektrik şəbəkəsi infrastrukturunun kompleks şəkildə gücləndirilməsi nəzərdə tutulur”, - deyə KEGOC-dan bildirilib.
Qeyd edək ki, Qazaxıstan, Azərbaycan və Özbəkistan arasında “yaşıl enerji"nin inkişafı və ötürülməsi sahəsində strateji tərəfdaşlıq haqqında saziş 2024-cü ildə Bakıda keçirilən COP29 çərçivəsində üç dövlət başçısının iştirakı ilə imzalanıb.
Layihə Xəzər dənizi vasitəsilə “yaşıl” elektrik enerjisinin ötürülməsi və daha sonra Avropa istiqamətinə çıxış üçün infrastrukturun yaradılmasını nəzərdə tutur. Layihə çərçivəsində Aktau və Bakıda çevirici yarımstansiyaların tikintisi, Xəzər dənizinin dibi ilə təxminən 350-400 kilometr uzunluğunda sabit cərəyan kabel xəttinin çəkilməsi, həmçinin iştirakçı ölkələrin milli elektrik şəbəkələrinin gücləndirilməsi nəzərdən keçirilir.
Layihənin hazırlanması və həyata keçirilməsi məqsədilə Qazaxıstan, Azərbaycan və Özbəkistan üç ölkənin sistem operatorlarının bərabər pay iştirakı ilə Green Corridor Alliance birgə müəssisəsini yaradıblar.
2022-ci il dekabrın 17-də Azərbaycan, Gürcüstan, Rumıniya və Macarıstan 1 000 MVt gücündə, ümumi uzunluğu 1 195 kilometr olan sualtı elektrik enerjisi kabelinin Qara dənizin dibi ilə çəkilməsini nəzərdə tutan strateji tərəfdaşlıq haqqında saziş imzalayıblar.
Kabel Azərbaycanda və Gürcüstanda istehsal olunan “yaşıl” elektrik enerjisinin Rumıniyaya, daha sonra isə Macarıstana və Avropanın digər ölkələrinə ötürülməsi üçün nəzərdə tutulub. Bu, Avropanın Qafqaz regionunun bərpa olunan enerji mənbələrinə çıxışını genişləndirəcək.
