Bakı. Trend:
Rus sərhədçilərinin "Zvartnots" hava limanından çıxarılması məsələsi birdəfəlik həll olunub, İrəvan və Moskva artıq bunu müzakirə etmir.
Trend xəbər verir ki, bu barədə Ermənistan parlamentinin spikeri Alen Simonyan brifinqdə deyib.
Bu məsələnin Ermənistan üçün həll olunduğunu deyən Simonyan artıq bununla bağlı hər hansı müzakirənin aparılmadığını bildirib.
"Biz bildirdik ki, yardımınıza görə sizə minnətdarıq, lakin hazırda bu yardım bizə lazım deyil. Rus sərhədçiləri bu il avqustun 1-dək "Zvartnots" hava limanını tərk edəcəklər", - Simonyan deyib.
Xatırladaq ki, martın 6-da Ermənistan Təhlükəsizlik Şurasının katibi Armen Qriqoryan Zvartnots hava limanında rus sərhədçilərinin mövcudluğu ilə bağlı Moskvaya rəsmi məktub göndərildiyini deyib.
Martın 12-də Rusiya prezidentinin mətbuat katibi Dmitri Peskov İrəvanın rəsmi bildirişini aldıqlarını təsdiqləyib.