Bakı. Elçin Hüseynov - Trend:
Avropa Parlamentində (AP) Türkiyə ilə Avropa İttifaqı arasında vizasız rejimin tətbiqinə dair aparılan müzakirələr dayandırılıb.
Trend RİA Novosti-yə istinadən xəbər verir ki, bu barədə AP deputatı Yudit Sippel bildirib.
AP-nin sədri Martin Şults deyib ki, müzakirələr Türkiyə tərəfinin qarşısında qoyulmuş 72 şərtin icrasından sonra bərpa olunacaq.
Avropa İttifaqı ilə Turkiyə arasında vizasız rejimin tətbiqi Ankara ilə Brüssel arasında imzalanmış qaçqınlara dair sazişin bir bəndidir. Bu sazişə əsasən, Türkiyə Avropa İttifaqının 72 tələbini yerinə yetirməsinə dair öhdəlik qötürüb.
Keçən həftə Avropa Komissiyası Türkiyənin iyunun axırınadək son 5 şərtin tətbiqini yerinə yetirməsi şərti ilə viza rejiminin ləğvini təklif etdi.
Avropa Komissiyasının belə mövqeyini Türkiyə Prezidenti Rəcəb Tayyıb Ərdoğan kəskin pisləyib. O bildirib ki, Ankara terrorizmlə mübarizəyə dair qanunvericiliyini dəyişdirə bilməz.