Bakı. Trend:
Erməni vəhşiliklərinin miqyasını həmçinin münaqişə ilə əlaqədar bir neçə min Azərbaycan vətəndaşının itkin düşməsi faktı da sübut edir.
Trend-in məlumatına görə, bunu Azərbaycanın BMT-dəki Daimi Nümayəndəsinin müavini Tofiq Musayev bu gün Azərbaycana qarşı müharibə cinayətləri” adlı seminarda deyib.
O bildirib ki, onların sayı 719 nəfər dinc sakin olmaqla 3890 nəfərdir.
"Dinc sakinlərdən 71-i uşaq, 267-si qadın və 326-sı yaşlı insanlardır. Müəyyən olunub ki, 872 nəfər (605 hərbçi və 29-u uşaq, 98-i qadın və 112-si yaşlı insanlar olmaqla 267 dinc sakin) müharibədə hərbi əsir və girov kimi götürülüb. Xüsusilə qeyd edilməlidir ki, Beynəlxalq Qızıl Xaş Komitəsi Ermənistan əsarəti altında olan zaman 6-sı qadın olmaqla 54 azərbaycanlını ziyarət edib. BQXK-in ziyarəti zamanı sağ olan bu 54 azərbaycanlı sonradan 1993-95-ci illərdə qətlə yetirilib. Onlardan yalnız 17-nin, o cümlədən Ermənistan və əsasən də İrəvan ərazisində saxlanılan və sonradan öldürülən 12 nəfərin meyiti Azərbaycana təhvil verilib. Daha 33 nəfərin öldüyü barədə məlumat verilsə də meyitləri Azərbaycana qaytarılmayıb, 4 nəfərin taleyi isə məlum deyil", - T.Musayev qeyd edib.