Azərbaycan, Bakı, 5 may /Trend, müxbir K.Zərbalıyeva/
Azərbaycan Daxili İşlər Nazirliyinin keçirdiyi əməliyyat zamanı "Mur-Ay" MMC-nin sədri saxlanılıb.
DİN-in mətbuat xidmətindən Trend-ə verilən məlumata görə, "Mur-Ay" MMC-nin sədri vəzifəsində işləmiş Bakı şəhər sakini, 1966-cı il təvəllüdlü Elxan Hüseynov bir qrup şəxslə cinayət əlaqəsinə girərək Yeni Yasamal massivi, Xiyabani küçəsi, 18-də inşa edilən çoxmərtəbəli yaşayış binasındakı bir mənzili bir neçə şəxsə sataraq vətəndaşlara külli miqdarda ziyan vurub.
Hüseynov istintaqdan yayındığı üçün barəsində axtarış işi açılmışdı.
Mayın 4-də DİN Baş Cinayət-Axtarış İdarəsi əməkdaşlarının həyata keçirdikləri kompleks əməliyyat-axtarış tədbirləri nəticəsində Hüseynov Bakı şəhərində tutularaq istintaqa təhvil verilib.
Faktla bağlı DİN-in Baş İstintaq və Təhqiqat İdarəsi tərəfindən Cinayət Məcəlləsinin 178.3.2-ci (dələduzluq) maddəsi ilə cinayət işi başlanıb.