Azərbaycan, Bakı, 2 mart /Trend/
Şənbə günü Tacikistan Ümumdünya Ticarət Təşkilatının tamhüquqlu üzvü olub. Trend-in İnterfaksa istinadən verdiyi məlumata görə, fevralın 4-də respublikanın nümayəndəsi Cenevrədə Tacikistanın ÜTT-yə qoşulması ilə bağlı Protokolun ratifikasiyası haqqında şəhadətnaməni bu təşkilatın katibliyinə təqdim edib.
Bir müddət öncə Tacikistanın xarici işlər nazirliyi bildirib ki, 2013-cü ilin mart ayının 2-də respublika təşkilatın tamhüquqlu üzvü olacaq.
Tacikistan parlamenti Protokolu yanvar ayının 9-da ratifikasiya edib. Protokol isə 2012-ci ilin dekabr ayının 10-da Tacikistan prezidenti Emomali Rahmon və ÜTT-nin baş direktoru Paskal Lami arasında imzalanıb.
Tacikistanın iyun ayının 7-dək vaxtı var idi ki, parlamentdə Protokol ratifikasiya edilsin.
Qeyd edək ki, Tacikistan Mərkəzi Asiyada Qırğızıstandan sonra ikinci dövlətdir ki, ÜTT-yə qoşulub.