Bakı. Trend:
Binəqədi Rayon İcra Hakimiyyəti, Azərbaycan Prezidentinin İşlər İdarəsinin Siyasi Sənədlər Arxivi və Yeni Azərbaycan Partiyası Binəqədi Rayon Təşkilatının birgə təşkilatçılığı ilə Azərbaycan xalqının Ümummili lideri Heydər Əliyevin 14 iyul 1969-cu ildə Azərbaycanda siyasi hakimiyyətə gəlişinin 49-cu ildönümünə həsr edilmiş “Milli dirçəlişin təməl tarixi” adlı tədbir keçirilib.
Rayon İH-dən Trend-ə verilən məlumata görə, tədbirdən öncə iştirakçılara Azərbaycan Prezidentinin İşlər İdarəsinin Siyasi Sənədlər Arxivində saxlanılan, 1969-1982-ci illəri əhatə edən sənədlərdən ibarət sərgi nümayiş edilib. Daha sonra qonaqlar Azərbaycan Prezidentinin İşlər İdarəsinin Siyasi Sənədlər Arxivi binasında Ulu Öndər Heydər Əliyevin büstü önünə gül qoyublar.
Tədbirdə Binəqədi Rayon İcra Hakimiyyətinin başçısı Elxan Allahverdiyev, RİH başçısının müavinləri, Azərbaycan Prezidentinin İşlər İdarəsinin Siyasi Sənədlər Arxivinin direktoru Elmira Ələkbərova, Milli Məclisin Sosial qanunvericilik şöbəsinin müdiri Adilə Abbasova, millət vəkilləri Fəzail İbrahimli, Kəmaləddin Qafarov və Pərvin Kərimzadə, Yeni Azərbaycan Partiyası Nizami rayon təşkilatının sədri Səqadət Vəliyeva, Binəqədi Rayon İcra Hakimiyyətinin və Prezidentin İşlər İdarəsinin və Siyasi sənədlər Arxivinin məsul əməkdaşları, səhiyyə, məktəb və məktəbəqədər təhsil müəssisələrinin rəhbərləri, YAP Binəqədi Rayon Təşkilatının gəncləri iştirak edib.
Tədbiri açıq elan edən Azərbaycan Prezidentinin İşlər İdarəsinin Siyasi Sənədlər Arxivinin direktoru Elmira Ələkbərova 1969-1982-ci illərdə Bakı şəhərinin mənzil fondunun artırılması baxımından müstəsna əhəmiyyət daşıyan Əhmədli, Günəşli, Yeni Əhmədli və Yeni Günəşli qəsəbələri, yeni mikrorayonlar, yaşayış massivləri salındığını qeyd edib. Natiq 1970-1979-cu illərdə Bakıda 10 metrostansiya inşa edildiyini, 70-80-ci illərdə Bakı Neftayırma zavodlarının köklü sürətdə yenidən quruluğunu bildirib. Siyasi Sənədlər Arxivinin Elmi Araşdırmalar və elmi kitabxana şöbəsinin müdiri, tarix elmləri doktoru Lalə Hüseynova Ulu Öndərin 1982-ci ildən başlanan Kremldəki fəaliyyətinin də Azərbaycana və xalqımıza yalnız baş ucalığı gətirdiyini qeyd edib.
Çıxış edən Milli Məclisin deputatı, tarix elmləri doktoru, professor Fəzail İbrahimli Sovet rejiminin bütün xüsusiyyətlərinə dərindən bələd olan Heydər Əliyevin zəngin idarəçilik təcrübəsi sayəsində Azərbaycanı düşmüş olduğu çox ağır vəziyyətdən çıxarmaq üçün qəti addımlar atdığını, dahiyanə uzaqgörənliklə ölkənin uzunmüddətli, dinamik və hərtərəfli inkişafını təmin edə bilən kompleks inkişaf proqramları hazırladığını bildirib.
Milli Məclisin deputatı, Yeni Azərbaycan Partiyası Nizami rayon təşkilatının sədri Səqadət Vəliyeva qeyd edib ki, ilk addımlarından böyük xalq rəğbəti ilə qarşılanan görkəmli dövlət adamı Sovet İttifaqı kimi böyük bir dövlətin zəngin iqtisadi potensialından və geniş imkanlarından istifadə edərək, Azərbaycanın tərəqqi yoluna çıxarılması siyasətini özünəməxsus müdrikliklə həyata keçirirdi.
Milli Məclisin deputatı Pərvin Kərimzadə Heydər Əliyevin bütün təzyiq və təhdidlərə, təhlükələrə sinə gələrək 1990-ci ilin iyul ayında Azərbaycan torpağına, dünyaya göz açdığı qədim Naxçıvana qayıtdığı illərdən bəhs edib. Natiq xalqın onu öz övladı, xilaskarı kimi qəbul etdiyini, dayaq olduğunu qeyd edib.
Milli Məclisin deputatı Kəmaləddin Qafarov Ulu Öndərin ağrılı illərdə Azərbaycanın müstəqilliyinin daimiliyi, əbədiliyi haqda çox düşündüyünü, Naxçıvanda eyni əqidəli insanların onun ətrafında sıx birləşdiyini diqqətə çatdırıb.
Siyasi Sənədlər Arvixinin əməkdaşı Nurlanə Muradova Heydər Əliyevin səyi nəticəsində 1994-cü ildə “Əsrin Müqaviləsi” imzalandığını, yeni müqavilələr və kontraktların ölkəmizin iqtisadiyyatının güclənməsinə səbəb olduğunu bildirib.
Binəqədi Rayon İcra Hakimiyyətinin başçısı Elxan Allahverdiyev böyük siyasətçi, həyatımız boyu öyünəcəyimiz, iftixar və qürur duyaçağmız böyük şəxsiyyət, vətəndaş, ictimai xadim, dahi dövlət adamı, millət atası, Ulu Öndər Heydər Əliyevin Azərbaycan rəhbərliyinə çətin və mürəkkəb bir şəraitdə, respublikada sosial-iqtisadi həyatın tənəzzül dövründə gəldiyini qeyd edib. Natiq ölkə rəhbərliyinə gəlişinin ilk günlərindən Heydər Əliyevin qarşısında hələ həmin dövrə qədər onun sələflərinin heç birinin cəsarət edə bilmədiyi misli görünməmiş vəzifələrin həlli dayandığını əlavə edib.
Elxan Allahverdiyev inkişafın Azərbaycan modelini seçən ölkəmizin Heydər Əliyev yolu ilə 15 ildir ki, tərəqqiyə doğru addımladığını, ölkəmizin müxtəlif beynəlxalq tədbirlərin, idman yarışlarının, mahnı müsabiqələrinin keçirilməsinə rəhbərlik ediyini, ölkə başçısı, Ali Baş Komandan İlham Əliyevin rəhbərliyi ilə şanlı ordumuzun bizlərə yeni-yeni qələbə sevincləri yaşatdığını qeyd edib.
Daha sonra Ümummili liderin fəaliyyətindən bəhs edən videoçarx nümayiş olunub.
Tədbir bədii hissə ilə davam etdirilib.
