Qazaxıstanın baş naziri Danial Axmetov Azərbaycana səfər edəcək. Bu barədə Trend ə bu ölkənin Azərbaycandakı səfiri Andar Şukputov məlumat verib.
Səfirin sözlərinə görə, səfərdə məqsəd İqtisadi Əməkdaşlıq Təşkilatının (İƏT) mayın 5-də Bakıda keçiriləcək növbəti sammitində iştirak etməkdir. İclasda təşkilata üzv olan 10 dövlət və ya hökumət başçılarının nümayəndələrinin iştirakı gözlənilir. Zirvə görüşündə iştirak etmək üçün artıq onlara dəvət ünvanlanıb.
İƏT 1985-ci ildə yaradılıb və 12 mart 1977-ci ildə Türkiyə, Pakistan və İran arasında imzalanmış İzmir sazişi əsasında fəaliyyət göstərən, İnkişaf üçün regional əməkdaşlıq təşkilatının hüquqi varisidir. 1992-ci ildə təşkilata Azərbaycan, Əfqanıstan, Qazaxıstan, Qırğızıstan, Tacikistan, Türkmənistan və Özbəkistan qoşulub.
İƏT-in yaradılmasında əsas məqsəd ona daxil olan ölkələrin müntəzəm və hərtərəfli sosial-iqtisadi inkişafı üçün şərait yaratmaqdan, region dövlətlərinin dünya təsərrüfat əlaqələri sisteminə davamlı inteqrasiyasından, mədəniyyət, texniki və elmi sahələrdə fəal regional əməkdaşlığın qurulması və qarşılıqlı yardımın göstərilməsindən ibarətdir.