Azərbaycan, Bakı, 18 yanvar / Trend , müxbir H.Bağırov/
Azərbaycanda terror barədə yalan məlumat verməkdə ittiham olunan məktəb direktoruna 2 il cəza verilib.
Trend -un məlumatına görə, bu gün Ağır Cinayətlərə Dair İşlər üzrə Məhkəmədə Şəmkir rayonu Çənlibel kəndindəki orta məktəbin direktoru Hidayət Hüseynovun işi üzrə keçirilən prosesdə hökm elan olunub.
53 yaşlı Hidayət Hüseynov sərxoş vəziyyətdə bu il oktyabrın 17-də Şəmkir rayon Polis İdarəsinə, sonra isə Fövqəladə Hallar Nazirliyinin 112 xidmətinə zəng edərək, rəhbərlik etdiyi orta məktəbə bomba qoyulması barədə xəbər verib.
Məktəbdə hüquq-mühafizə orqanlarının əməkdaşları araşdırma aparsalar da, məlumat təsdiqini tapmayıb. Hüseynov rayon Polis İdarəsinin əməkdaşları tərəfindən saxlanılıb.
Hüseynov Cinayət Məcəlləsinin 216-cı (terrorla hədələmə) maddəsi ilə ittiham olunub.
Hüseynovun 33 illik pedaqoji təcrübəsi var, 1990-cı ildən məktəb direktoru vəzifəsində işləyir.