Azərbaycan, Bakı, 28 yanvar / Trend , müxbir H.Bağırov/
Azərbaycanda iki nəfəri qətlə yetirmiş şəxsin məhkəməsi keçirilib.
Trend -un məlumatına görə, bu gün Ağır Cinayətlərə Dair İşlər üzrə Məhkəmədə Salyan rayon sakini, 1959-cu il təvəllüdlü Əliniyaz Əlihəsən oğlu Məmmədovun cinayət işi üzrə keçirilən prosesdə prokuror çıxış edib. Prokuror Məmmədovun 15 il azadlıqdan məhrum edilməsini istəyib.
Məhkəmə fevralın 8-də hökm elan edəcək.
Təqsirləndirilən şəxs Cinayət Məcəlləsinin xüsusi amansızlıqla və ya ümümi təhlükəli üsulla adam öldürmə (120.2.4), iki və ya daha çox şəxsi öldürmə (120.2.7) maddələri ilə ittiham olunub.
Salyan rayonu Quyçu kənd sakini olan Məmmədov həmkəndlisi 1969-cu il təvəllüdlü Malik Nurəddin oğlu Hüseynovu və onun həyat yoldaşı 1969-cu il təvəllüdlü Aybəniz İbrahim qızı Əliyevanı bıçaqlayaraq qətlə yetirib.
