Azərbaycan, Bakı, 9 dekabr /Trend, müxbir K.Zərbalıyeva/
Bu gün "Məişət zorakılığının qarşısının alınması haqqında" qanunun kommentariyası" adlı kitabın təqdimatı keçirilib.
Trend-in məlumatına görə, tədbirdə çıxış edən Ailə, Qadın və Uşaq Problemləri üzrə Dövlət Komitəsinin sədri Hicran Hüseynova bildirib ki, qadınlara münasibətdə zorakılığın qarşısının alınması təkcə Azərbaycanda deyil, bütün dünyada diqqət mərkəzində olan məsələdir.
Dünyanın bir çox ölkələrində zorakılıq, xüsusən də gender əsaslı zorakılıq hallarının hələ də davam etməsindən təəssüflənən Komitə sədri Azərbaycanda da bu problemin mövcudluğunu qeyd edib.
Hüseynova qanunun implementasiyası ilə bağlı tədbirlərin hazırlanmasını vacib sayıb.
Türkiyə təcrübəsini nümunə gətirən Komitə sədri deyib ki, bu ölkədə məişət zorakılığının qarşısının alınması barədə qanunun implementasiyası ilə bağlı fiziki zorakılıq təhlükəsi ilə qarşılaşan qadınların mühafizəsinin təmin olunması, potensial zorakılıq subyektlərinə nəzarətin həyata keçirilməsi, zorakılıq qurbanları üçün reabilitasiya mərkəzlərinin yaradılması ilə bağlı tədbirlər müəyyən edilib.
Komitə sədri xüsusi vurğulayıb ki, gələcəkdə bu sahədə fəaliyyət daha da genişləndirilməli və qanunun implementasiyası ilə bağlı tədbirlər həyata keçirilməlidir.
BMT-nin Əhali Fondunun nümayəndəsi Fərid Babayev çıxışında bildirib ki, Azərbaycan bu qanunu qəbul etməklə məişət zorakılığını ailədaxili problem kimi deyil, insan hüquqlarının pozulması kimi rəsmiləşdirdi.
Kitabın müəllifi, Konstitusiya Məhkəməsinin hakimi, hüquq üzrə fəlsəfə doktoru Ceyhun Qaracayev çıxışında bildirib ki, dünyada hər həftə 3 qadın məişət zorakılığından dünyasını dəyişir, hər 4-cü ailədə məişət zorakılığı baş verir.
Milli Məclisin Hüquq siyasəti və dövlət quruculuğu komitəsinin sədri Əli Hüseynli bildirib ki, kitab qanunun düzgün başa düşülərək tətbiq olunması məqsədi ilə hazırlanıb.
Kitab Azərbaycan Hüquqşünasları Konfederasiyası, Ailə, Qadın və Uşaq Problemləri üzrə Dövlət Komitəsi, Avrasiya Hüquqşünaslar Assosiasiyasının birgə əməkdaşlığı nəticəsində hazırlanıb.
132 səhifəlik kommentariyanın müəllifi Konstitusiya Məhkəməsinin hakimi Ceyhun Qaracayevdir.
Kitabda "məişət zorakılığı" termininin anlayışı, məişət zorakılığı ilə mübarizə sahəsində beynəlxalq-normativ aktların xüsusiyyəti, xarici ölkələrin və Azərbaycan təcrübəsinin təhlili ilə yanaşı, "Məişət zorakılığının qarşısının alınması haqqında" qanunun maddələrinə dair kommentariya verilib.
Kitab 4000 tirajla Azərbaycan dilində nəşr olunaraq bütün hüquq mühafizə orqanlarının akademiyalarında və hakimlər, vəkillər, prokurorlar arasında qanunun düzgün başa düşülərək tətbiq olunması məqsədi ilə yayılacaq.
Kitabın elmi redaktoru hüquq üzrə fəlsəfə doktoru, Milli Məclisinin Hüquq siyasəti və dövlət quruculuğu komitəsinin sədri, Azərbaycan Hüquqşünasları Konfederasiyasının sədri Əli Hüseynli, rəyçilər - siyasi elmlər doktoru, Ailə, Qadın və Uşaq Problemləri üzrə Dövlət Komitəsinin sədri Hicran Hüseynova, hüquq elmləri doktoru, Milli Məclisin Dövlət quruculuğu üzrə qanunvericilik şöbəsinin müdiri Lətif Hüseynov, hüquq üzrə fəlsəfə doktoru, AMEA-nın İnsan Hüquqları Elmi Tədqiqat İnstitutunun Vətəndaş və siyasi hüquqlar şöbəsinin müdiri, Azərbaycan Hüquqşünasları Konfederasiyasının baş katibi Nadir Adilovdur.
Həyata keçirilən layihənin koordinatoru Avrasiya Hüquqşünaslar Assosiasiyasının sədr müavini Xanlar Ağalarovdur.
Kitab hüquq fakültələrinin müəllim və tələbələri, habelə, dövlət təşkilatlarının və idarələrinin əməkdaşları və gender bərabərliyi sahəsinə maraq göstərən geniş oxucu auditoriyasına tövsiyə edilir. Kitab pulsuz yayılır.
Məqalə müəllifi ilə əlaqə ünvanı news@trend.az
Bizi Twitter-dən izləyin @trend_az
Trend-in ən mühüm və maraqlı xəbərlərini "Telegram"da izləyin
