Noyabrın 3-də Bakıda "Səhiyyə"-BİHE 2005 11-ci beynəlxalq sərgisi çərçivəsində "Dermatovenerologiya: nailiyyətlər və perspektivlər" adlı 4-cü elmi-təcrübi konfrans öz işinə başlayıb. Trend in xəbər verdiyi kimi, tədbirdə Türkiyə, Gürcüstan, Ukrayna və digər ölkələrdən 100-dən artıq mütəxəssis iştirak edib.
Tədbirin açılışında çıxış edən A.Əliyev adına Azərbaycan Dövlət Həkimləri Təkmilləşdirmə İnstitutunun Dermatovenerologiya kafedrasının müdiri Sənan Kərimov tibb elminin bu sahəsində aparılan tədqiqatlara həsr olunmuş tədbirləri qeyd edərək iştirakçılara kafedranın yaranma tarixi və inkişafı, kadrların hazırlanması haqqında məlumat verib.
Konfransda XXI əsrdə dermatovenerologiyanın inkişaf prespektivləri, Vitiliqolu xəstələrdə hüceyrə immunitetinin parametrlərinin dəyişməsi, diaqnostika və trixomoniazın müalicəsinin təkmilləşdirilməsi, iltihablı xəstəliklərin müasir diaqnostika və terapiya üsulları və digər məsələlər müzakirə edilib.
