Bakı. Trend:
Elvin Cəfərquliyev vacib oyunlarda qırmızı vərəqələr aldı. Bu da psixoloji olaraq ona təsir elədi.
Trend İdman.biz-ə istinadən xəbər verir ki, bunu Azərbaycan millisinin sabiq futbolçusu İlqar Qurbanov deyib.
Yığmada seleksiyaçı vəzifəsini yerinə yetirən gənc mütəxəssis Avropa Liqasında “Braqa” - “Qarabağ” (3:2) oyununda hakimi təhqir edən Elvin Cəfərquliyevin UEFA klub turnirlərdindən iki oyunluq diskvalifikasiyasına münasibət bildirib.
Qurbanovun sözlərinə görə, futbolçu Bolqarıstanla görüşdə də aqresiv hərəkətləri ilə diqqət çəkib:
“Cəfərquliyev belə etməməlidir. Həm özünə, həm də oynadığı komandaya ziyan vurur. Amma istər-istəməz belə arenalarda stress çox olur. Məsuliyyət çox olanda da problemlər yaşayır. Amma inanıram ki, Elvin bu problemi qısa vaxtda aradan qaldıracaq”.
Qeyd edək ki, Cəfərquliyev UEFA Avropa Liqasının pley-off mərhələsində “Braqa”ya qarşı ev oyunu və 1/8 finalda “Bayer”ə qarşı səfər matçında qırmızı vərəqə alıb.