Azərbaycan, Bakı, 24 avqust / Trend , müxbir Ü.İsmayılova /
İyulda Bakıda inşaat materialları bazarında qiymətlərin 2,7 faizlik enməsi müşahidə olunub. Bazar ertəsi "Əmlak bazarının iştirakçıları" İctimai Təşkilatından məlumat verilib.
"İlin əvvəlində qiymətlər 6,9 faiz, ötən ilin müvafiq dövrünə nisbətən isə 46,7 faiz enib", - məlumatda deyilir.
Bakı bazarında iyulda 38 adda və 87 çeşiddə inşaat materiallarının monitorinqi keçirilib. Onlardan 14-nün qiymətində enmə, 18-nin qiymətində yüksəlmə müşahidə edilib. 55 növün qiyməti isə stabil qalıb.
Həmin 14 növ Bakı inşaat materialları bazarının əsas hissəsini təşkil etdiyindən onların qiymətinin dəyişməsi ümumi qiymətlərin dəyişməsinə gətirib çıxarıb.
Qiymətlərin enməsi əsasən yapışqanda 28,5%, çınqılda 5,9%, xırda mismarda 5,2%, dam örtüyündə 8,9%, ağacda 8,1%, şüşədə 1,2% və s. müşahidə edilib.
Qiymətlərin bahalaşması şüşə pambıqda 28,5%, bitumda 18,4%, mişar daşında 3,3%, kərpicdə 8,1%, qumda 6,1%, dəmir təbəqədə 4,6% və s. müşahidə olunub.
İyulda bazarda yerli inşaat materiallarının istehsalı 52,9% təşkil edib.
Məqalə müəllifi ilə əlaqə ünvanı: [email protected]
