Azərbaycan, Bakı, 10 avqust /Trend, müxbir N.İsmayılova/
İlin ilk yarısında Azərbaycanın bank sektorunun aktivlərinin həcminin dəyişməsinə daha çox kreditlərin verilməsi dinamikası təsir göstərib. Bu barədə AMB-nin maliyyə sabitliyi üzrə açıqladığı hesabatda deyilir.
Hesabatda deyildiyinə görə, hesabat dövrü ərzində ölkə iqtisadiyyatının əksər sahələrində kredit qoyuluşlarının həcmi artıb. Ev təsərrüfatlarına verilən kreditlər ilin əvvəlindən 8,5 faiz artaraq iyunun sonuna 2,7 milyard manat təşkil edib.
Hesabat dövrünün sonuna fiziki şəxslərə verilən kreditlərin payı ölkə banklarının ümumi kredit portfelində 31,4 faiz təşkil edib.
Milli valyutada kreditlərin xüsusi çəkisi iyulun 1-nə 62 faiz təşkil edib. Uzunmüddətli kreditlərin xüsusi çəkisi ilin əvvəlindən 5,1 faiz azalıb və 67,9 faiz və ya 5,9 milyard manat təşkil edib.
Qısamüddətli kreditlər ilin ilk yarısında 15,6 faiz artaraq 2,8 milyard manat olub.
Ötən ilin müvafiq dövrünə nisbətdə fiziki şəxslərin istehlak kreditləri və plastik kartlar vasitəsilə kreditləşdirilməsində artım müşahidə olunub (müvafiq olaraq 332,2 milyon manat və 24,5 milyon manat).
Fiziki şəxslərin kreditləşdirilməsi 16,6 faiz artıb və mayın 1-nə onların həcmi 378,8 milyon manata çatıb.
İyulun 1-nə olan məlumata görə, ev təsərrüfatlarına verilən kreditlərin 73,7 faizi istehlak kreditlərinin payına düşüb. Sahibkarlıq fəaliyyətinin aparılması üçün olan kreditlər il ərzində 8-9 faiz arasında dəyişib.
Plastik kartlar avsitəsilə verilən kreditlərin həcmi də 19,6 faiz artıb. İyulun 1-nə o 149,4 milyon manat olub.
Uzunmüddətli kreditlər fiziki şəxslərin kredit portfelində 69,8 faiz (2,1 milyard manat) təşkil edib.
Ölkə regionlarında kreditləşmə yanvar-iyunda 6 faiz artıb. İyulun 1-nə olan məlumata görə, regionlarda milli valyutada kreditlərin payı 72,5 faiz təşkil edib. Uzunmüddətli kreditlərin payına isə 63,8 faiz düşüb.
Bankların apardığı araşdırma ümumilikdə kreditlərə tələbatın olduğunu göstərir və növbəti rübdə bu tələbatın yüksək səviyyədə qalacağı gözlənilir.
Avqustun 10-na olan rəsmi məzənnə 0,7865 AZN/USD təşkil edir.
