Azərbaycan, Bakı, 6 avqust /Trend, müxbir Ə.Həsənov/
2012-ci ildə İqtisadi İnkişaf Nazirliyi yanında Sahibkarlığa Kömək Milli Fondunun (SKMF) xətti ilə verilən kreditlərin qaytarılması hesabına təmin edilən maliyyələşdirmənin həcmi 70 milyon manata çatıb. Trend-in məlumatına görə, bu barədə cümə günü SKMF-nin icraçı direktoru Şirzad Abdullayev jurnalistlərə bildirib.
"Bu, ötən ildəkindən 60 faiz çoxdur", - Abdullayev qeyd edib.
Onun sözlərinə görə, ilin sonunadək qaytarılan vəsaitlər hesabına maliyyələşdirmənin həcmi daha 40 milyon manat arta bilər.
2012-ci ilin əvvəlindən SKMF 1546 investisiya layihəsinin maliyyələşdirilməsinə 127,9 milyon manat məbləğində güzəştli kredit verib. Bu layihələrin reallaşdırılması təqribən 6400 yeni iş yerinin yaradılmasına kömək edəcək.
Fond 2012-ci ildə respublika üzrə 200 milyon manat məbləğində kredit verməyi planlaşdırır, onlardan 110 milyon manatı qaytarılan kreditlər hesabına təmin ediləcək.