Azərbaycan, Bakı, 30 dekabr/ Trend , müxbir K.Zərbaliyeva, S.Kazımlı/ Azərbaycan ərazisində baş verən yol qəza hadisəsi nəticəsində zərər çəkən rusiyalı zəvvarlar ilk tibbi yardım göstərildikdən sonra evlərinə buraxılıblar.
Məkkədən qayıdan rusiyalı zəvvarlardan ibarət sərnişin avtobusu dünən təxminən saat 23.00-da Azərbaycanda qəzaya uğrayıb.
"MAN" markalı avtobus Bakı-Rostov trassının 40 km-də təqribən Zeynəlabdin Tağıyev qəsəbəsi yaxınlığında "KAMAZ" markalı yük maşını ilə toqquşub" Azərbaycan Daxili İşlər Nazirliyi Baş Dövlət Yol Polisi İdarəsinin mətbuat xidmətindən çərşənbə axşamı Trend -a məlumat verilib. Məlumata görə avtobusda Dağıstanlı zəvvarlar olub.
Qəza nəticəsində üç nəfər zərər çəkib. Bunlar avtobusun sürücüsü, 1955-ci il təvəllüdlü Tacəddin Kaladdinov, sərnişinlər Səlimxan Şamilov və Zeynəb Abdullayevadır. İlk tiibbi yardım göstərildikdən sonra zərərçəkənlər evlərinə buraxılıb. Mətbuat xidmətindən verilən məlumata görə, "KAMAZ"-ın sürücüsü hadisə yerindən qaçıb, onun şəxsiyyətini müəyyən etmək hələ mümkün olmayıb.
Sumqayıt Şəhər Polis İdarəsinin müstəntiqi Radil Əsədov Trend -a bildirib ki, hadisənin baş verməsinə yolun qarşı xəttinə çıxan "KAMAZ" səbəb olub.
Məqalə müəllifi ilə əlaqə ünvanı: [email protected]