Rusiya, Moskva/ Trend müxbir R.Ağayev/ Moskvada Rusiyanın Xalqlar Dostluğu Universitetində (RXDU) bayram tədbirinin sonunda azərbaycanlı və erməni gəncləri arasında böyük dava olub.
Hələ RXDU-də təşkil olunan tədbirin gedişi zamanı ermənilər bir neçə dəfə azərbaycanlı gəncləri süni surətdə gərginliyə təhrik ediblər. Ermənilərin tanınmamış separatçı Dağlıq Qarabağ rejiminin bayrağı ilə rəqs etdiklərini görən azərbaycanlı tələbələr bir neçə dəfə onlara bu cür hərəkətlər etməmək barədə xəbərdarlıq ediblər. Bundan əlavə azərbaycanlı tələbələr ermənilərin qanunsuz və təhrikedici hərəkətləri barədə hüquq-mühafizə orqanları və RXDU rəhbərliyini xəbərdar ediblər. Ermənilər isə azərbaycanlı gənclərin xahişini kobud surətdə rədd edərək açıq şəkildə antiazərbaycan ədəbiyyatı yayarkən azərbaycanlıların ciddi etirazı ilə qarşılaşıblar. Dava zamanı azərbaycanlılardan biri qondarma "DQR" in bayrağını cırıb.
Hətta xeyli sayda hüquq-mühafizə orqanı əməkdaşı, XTPD dəstələrinin gəlməsi və havaya atəş açılmasına baxmayaraq azərbaycanlılar və ermənilər arasında dalaşma davam edib.
64 saylı Moskva xəstəxanasından Trend ə verilən məlumata görə, dava zamanı güllə yarası alaraq xəstəxanaya gətirilmiş azərbaycanlı Ağəli Alışovdur. Onun 22 yaşı var. Artıq cərrahiyə əməliyyatı olunmuş Alışovun vəziyyəti barədə hələ ki, məlumat verilmir.
Məqalə müəllifi ilə əlaqə ünvanı news@trend.az
Bizi Twitter-dən izləyin @trend_az
Trend-in ən mühüm və maraqlı xəbərlərini "Telegram"da izləyin
