Azərbaycan, Gəncə, 9 may /Trend, V.Məmmədov/
Tovuz rayonunda Böyük Vətən Müharibəsində qələbənin 65 illiyi və Ümummilli lider Heydər Əliyevin anadan olmasının 87 illiyi münasibəti ilə silsilə tədbir keçirilib.
Tədbirdə millət vəkili Qənirə Paşayeva və rayon ictimaiyyətinin nümayəndələri iştirak edib. İlk olaraq Heydər Əliyevin abidəsi ziyarət olunub və abidə önünə gül dəstələri qoyulub. Sonra Böyük Vətən Müharibəsi iştirakçıları ilə birlikdə Heydər Əliyev muzeyində təbrik mərasimi keçirilib.
Rayon İcra Hakimiyyətinin başçısı Tofiq Zeynalov veteranları qələbənin 65 illiyi münasibəti ilə təbrik edərək onlara göstərilən qayğıdan danışıb. İcra başçısı bildirib ki, rayonda 124 Böyük Vətən Müharibəsi veteranı var və onlar daim rayon rəhbərliynin qayğısı ilə əhatə olunur.
Millət vəkili Qənirə Paşayeva deyib ki, Tovuzda bu gün iki böyük bayram qeyd edilir.
"Bunlardan biri ulu öndər Heydər Əliyevin anadan olmasının 87-ci ildönümü və Böyük Vətən Müharibəsində qələbənin 65 illiyidir. Hər iki əlamətdar hadisə bizə əzizdir. Veteranlar bizim üçün canlı örnəkdir. Biz qəhramanlıq və şücayəti onlardan öyrənməliyik. Ulu öndər də daim Böyük Vətən Müharibəsi iştirakçılarına qayğı göstərirdi. Onun siyasi davamçısı Prezident İlham Əliyev də bu qayğını davam etdirir" deyə Qənirə Paşayeva bildirib.
Millət vəkili tədbirdə Tovuz rayon sakini, Böyük Vətən Müharibəsi veteranı Ənvər Tağıyeva Əmək və Əhalinin Sosial Müdafiəsi Nazirliyi tərəfindən verilən avtomobilin açarını təqdim etdi. Qənirə Paşayevanın sözlərinə görə, bu ilin iyul ayında növbədə olan bütün Böyük Vətən Müharibəsi veteranları avtomobillə təmin olunacaq.
Tədbirdə veteranlara xatirə hədiyyələridə təqdim edilib. Tədbir 1941-1945-ci illərdə Böyük Vətən Müharibəsində həlak olanların xatirəsinə ucaldılan abidə kompeksinin ziyarəti ilə davam etdirilib. Burada həmiçnin Tovuzdan olan üç (Yusif Sadıqov, Məstan Əliyev və Mərdan Musayev) Sovet İttifaqı qəhrəmanının abidəsi də ziyarət olunub.
Daha sonra rayonda yerləşən N saylı hərbi hissədə bayram tədbiri davam edib. Burada bu gün hərbi and içən əsgərlər qarşısında çıxış edən Paşayeva vətənpərvərlik barədə danışaraq hərbiçilərə şərəfli peşələrində mətinlik arzulayıb. Ziyalı alim Qəzənfər Paşayev ordumuzun gücündən danışaraq ölkə başçısının bu sahəyə birbaşa diqqəti və qayığısından söz açıb.
"Bizim torpaqlarımızın 20 faizi işğal altındadır. Siz müstəqil Azərbaycanın qoruyucularısız. Sülh danışıqları davam edir. Əgər bu danışıqlar bir nəticə verməzsə, siz hər an işğal altında olan torpaqlarımızı müharibə yolu ilə azad etməyə hazır olmalısız" deyə Qəzənfər Paşayev bildirib.
Hərbi hissədə əsgərlərə hədiyyələr və Milli qəhramanlarımızdan bəhs edən kitablar təqdim edilib.
Məqalə müəllifi ilə əlaqə ünvanı news@trend.az
Bizi Twitter-dən izləyin @trend_az
Trend-in ən mühüm və maraqlı xəbərlərini "Telegram"da izləyin
