Heydər Əliyev Fondunun prezidenti, YUNESKO-nun xoşməramlı səfiri, Azərbaycan Milli Məclisinin deputatı Mehriban Əliyeva Türkiyənin "Kanal7" telekanalı və First Business jurnalının təsis etdiyi "Zirvədəkilər-2005" mükafatlarından birinə layiq görülüb. Bu barədə Trend ə jurnalın nümayəndəsi Yeganə Kadayıfçıoğlu məlumat verib.
Mehriban Əliyeva "Türk dünyasının ilin sevgi və dostluq elçisi" mükafatına layiq görülüb.
Mərasim mayın 17-də Bakı vaxtı ilə saat 21:00-da İstanbulun "Kaya Ramada" otelində keçiriləcək və "Kanal 7" ilə yayımlanacaq.
Mərasimdə işgüzar dairələrin 300-ə yaxın görkəmli nümayəndəsinin, siyasətçilərin, dövlət, mədəniyyət və incəsənət xadimlərinin iştirakı gözlənilir.
Mükafata layiq görülənlərin siyahısında Türkiyənin 9-cu prezidenti Süleyman Dəmirəl, ölkənin ekologiya naziri Osman Pepe və başqaları da var.
Mehriban Əliyevanın mükafatı Azərbaycanın İstanbuldakı baş konsulu İbrahim Nəbioğluna təqdim ediləcək.