Azərbaycan, Bakı, 10 sentyabr / Trend , müxbir A.Hüseynbala /
Azərbaycanda 2009-cu ilin səkkiz ayında 199 nəfər intihar edib.
"İntihar edənlərin 129 nəfəri kişi, 49 nəfəri qadın olub", - Trend -un ötən 8 ay ərzində rəsmi mənbələrə istinadən apardığı monitorinq nəticəsində məlum olub.
Səkkiz ay ərzində 21 nəfər uşaq və yeniyetmə müxtəlif vasitələrlə intihar edib. Bölgələr arasında isə ən çox özünəqəsd hadisəsi Şəmkir rayonunda (3 nəfər) qeydə alınıb. Beş uşaq və yeniyetmə Bakıda intihar edib, Lənkəran və Kürdəmir rayonlarının hərəsində isə iki nəfər özünü asıb.
Trend -un arayışı: Ümumdünya Səhiyyə Təşkilatının (ÜST) müvafiq qərarı ilə hər il sentyabrın 10-u özünəqəsdlə mübarizə günü kimi qeyd edilir.
ÜST-ün hesablamalarına görə, hər il dünyada 60 milyondan çox adam intihar etmək fikrinə düşür ki, onların da təxminən 1 milyonu bu qərarını həyata keçirir. ÜST-nin məlumatına görə, 2020-ci ildə intiharların sayı indiki göstəricinin yarısı qədər arta bilər
Səkkiz ayda intihar edənlərin on nəfərinin yaşı 60-dan yuxarı olub. Onların 6 nəfəri qadın olub. Azərbyacanda rus millətindən olan 3 qadın, 4 kişi özünə qəsd edib. Həmin müddətdə iki Gürcüstan vətəndaşı olan azərbaycanlı Bakıda həyatlarına qəsd edib.
İntiharlara görə ilk yerləri Şərqi Avropa ölkələri tutur. Ümumdunya Səhiyyə Təşkilatının statistikasına görə, əhalinin hər 100 min nəfərinə düşən özünəqəsd halları Litvada daha yüksəkdir. Litvada 100 min nəfərdən 42-si, Belarusda 37-si, Rusiyada 36-sı, Qazaxıstanda 30-u, Macarıstnda 28-i, Latviyada 26-sı, Ukraynada 25-i, Yaponiyada 24-ü Estoniyada 21-i, Finlandiyada 20-si, Fransada 18-i, İsveçrədə 17-si, Polşada 16-sı, Slovakiyada 14-ü, Rumıniyada 13-ü, Noveçdə-12-si, ABŞ-da 11-i, Hollandiyada 9-u, İtaliyada və Böyük Britaniyada 7-si, Albaniyada 4-ü, Yunanıstanda 3-ü intihar edir.
2008-ci ildə rəsmi mənbələrin yaydığı məlumatlara görə, Azərbaycanda 164 kişi, 57 qadın intihar edib. Ötən il 20 nəfər uşaq və yeniyetmə də özünəqəsd nəticəsində dünyalarını dəyişib.
Səkkiz ay ərzində Bakının müxtəlif rayonlarında intihar edənlərin 63 nəfəri kişi, 19 nəfəri qadın olub. Ölkənin şimal-qərb bölgəsində 16 nəfər intihar edib. Onların 7 nəfəri kişi, 2-si qadın olub. Bu bölgədə ən çox özünəqəsd hadisəsi Şəki rayonunda (7 nəfər) qeydə alınıb. Qərb bölgəsində 14 intihar faktı baş verib. Bu bölgədə isə ən çox Gəncə şəhərində (9 nəfər, onların 6-sı kişi, 3-ü qadındır) özünəqəsd olub. Cənub bölgəsində 9, şimal bölgəsində isə 7 intihar faktı rəsmən açıqlanıb. Bu ilin səkkiz ayında Sumqayıt şəhərində 13 nəfər müxtəlif vasitələrlə həyatlarına qəsd edib. Onların 7 nəfəri kişi, qalanı isə qadınıdr.
Səkkiz ay müddətində Quba rayon sakini Zərdabda, Rusiya vətəndaşı olan azərbaycanlı Lənkəranda, Şəkidə anadan olub Bakıda yaşayan bir nəfər həmin rayonda, Xaşmaz rayon sakini Nəsimi rayonu ərazisində, Naxçıvan Muxtar Respublikasının Babək rayon sakini isə Nərimanov rayonunda intihar edib.
Məqalə müəllifi ilə əlaqə ünvanı: [email protected]