Azərbaycan, Bakı, 26 noyabr/ Trend , müxbir Ü.İsmayılova/ Dünya Bankı ilə daşınmaz əmlakın vahid kadastrının yaradılması üzrə birgə layihə çərçivəsində Bakının Abşeron və Binəqədi rayonlarında qanunsuz tikililərin texniki inventarlaşdırılması onların sökülməsini nəzərdə tutmur və belə tikililərin dövlət qeydiyyatı üçün şərait yaradacaq, - Azərbaycanın Daşınmaz Əmlakın Dövlət Reyestri Xidmətinin rəhbəri Arif Qaraşov çərşənbə günü bildirib.
"Texniki inventarlaşdırma iki qrup obyekt üzrə aparılır - qanunsuz tutulmuş ərazilərdəki, normalara cavab verməyən tikililər və müvafiq orqanların icazəsi olmadan tikilmiş obyektlər", - Qaraşov bildirib.
Noyabrın əvvəlidnə Dünya Bankının ekspertləri Abşeron və Binəqədidə olub və yerində bəzi yaşayış massivlərində tikililərlə tanış olublar.
Qaraşovun sözlərinə görə, baxış başa çatdıqdan sonra, Dövlət Xidməti hökumətə bu obyektlərin qeydiyyatı üzrə təkliflər verəcək.
Dövlət xidməti layihə çərçivəsində belə tikililərlə bağlı vəziyyətin beynəlxalq normalara uyğun vəziyyətə gətirilməsi üzrə dövlət proqramının təhlili və işlənilməsini aparacaq. Hazırda gələcək podratçı üçün texniki vəzifənin hazırlanması başa çatır", - Qaraşov bildirib.
Dövlət xidməti rəhbərinin əvvəllər bildirdiyinə görə, Azərbaycanda 400 mindən çox qanunsuz tikili qeydiyyata alınıb və onların yalnız yarısı texniki təhlükəsizlik qaydalarına cavab verir.
Ekspertlər tikintinin qəbul edilmiş standartlar əsasında aparıldığı qərarına gəlsələr, bu tikililər qanuniləşdiriləcək. Onların sahiblərinə kompensasiyaların ayrılması, ya da daha əlverişli yaşayış şəraitinə köçürülməsi məsələsi təkliflər hökumətə təqdim edildikdən sonra həll ediləcək, - Qaraşov bildirib.
Azərbaycan hökuməti və DB 2007-ci ilin iyulunda daşınmaz əmlakın vahid kadastrı sistemini birgə tətbiq etmək haqqında saziş imzalayıb. Layihə dörd komponentdən ibarətdir - daşınmaz əmlakın qeydiyyatı; dövlət əmlakının idarə edilməsi və reyestri; baza xəritəçəkmə və torpaq kadastrı; treninqlər, siyasətin formalaşdırılması və layihənin idarə edilməsi.
Layihənin dəyəri 38,57 mln. dollar təşkil edir. Bunun 30 mln. dolları DB kreditinin payına düşür. Kredit ehtiyatları beş il güzəştli dövr olmaqla 20 il müddətinə ayrılıb.
Müəlliflə əlaqə saxlamaq üçün elektron ünvan: [email protected]