Azərbaycan, Bakı, 07 may / Trend , müxbir N.İsmayılova/
Azərbaycanın Qiymətli Kağızlar üzrə Dövlət Komitəsi (QKDK) ölkənin qiymətli kağızlar bazarının analizini aparıb. Bunun nəticəsində islahatlar və sonrakı addımlar üzrə əsas istiqamətlər müəyyən edilib ", - QKDK-nın sədri Rüfət Aslanlı deyib.
"Biz qiymətli kağızlar bazarı sahəsində qanunvericilik bazasının genişləndirilməsinə başlamışıq və "Sərmayə fondu" qanun layihəsinin işlənməsi və təminatlı ipoteka kağızları üzrə Mülki Məcəlləyə əlavə və dəyişikliklər edilməsi üzrə işləri başa çatdırırıq", - Aslanlı bildirib.
Onun sözlərinə görə, bu, iki impuls verəcək. Birincisi, bu, institusional sərmayədarlara imkanlar yaradacaq, çünki özəl sərmayədarlar ölkədə bir sinif kimi formalaşmayıb, digər tərəfdən isə bazarda yeni alətlər - təminatlı borc istiqrazları peyda olacaq.
"Biz artıq qiymətli kağızlar bazarının institusional formada təsəvvür etdiyimiz yeni arxitekturasını hazırlamışıq və bazar strukturunun təkmilləşdirilməsi prosesini başlamışıq. Bura birjadakı hərracın təşkili və klirinq, hesablaşma sistemləri də daxildir", - Aslanlı qeyd edib.
Onun sözlərinə görə, bu proseslərin realizəsi bu ilin sonuna qədər sürəcək.
Bakı Fond Birjasında bütün birja sövdələşmələri üzrə məcmu dövriyyə 2009-cu il yanvar-aprel ayları ərzində 2 189,88 milyon manat təşkil edib ki, bu da ötən ilin analoji dövründəki rəqəmdən 22,8 faiz azdır.
Məqalə müəllifi ilə əlaqə ünvanı: [email protected]
