Azərbaycan, Bakı, 08 may / Trend /
ABŞ-ın Ticarət və İnkişaf Agentliyi (USTDA) Azərbaycan Dövlət Mülki Aviasiya Administrasiyasına uçuşların təhlükəsizliyini təmin etmək və aviasiya daşımalarına ölkədə artan tələbatı ödəmək məqsədilə qrant ayırıb. Bu barədə USTDA-nın məlumatında deyilir.
Ayrılmış qrant mülki aviasiyanın texniki dəstəyini təmin etməklə və ABŞ-dan sənaye və xidmət məhsullarının daşınmasına şərait yaratmaqla təhlükəsiz uçuş sferasında Azərbaycan üçün beynəlxalq standartlara cavab vermək imkanı yaradacaq.
"Sözügedən qrant Azərğaycan və ABŞ arasında birbaşa hava marşrutlarının yaranması istiqamətində irəliyə bir addımdır. Bundan əlavə, qrant iki ölkə arasında ticarət və turizm imkanlarını nəzərə çarpacaq dərəcədə artıracaq", - müvəqqəti olaraq USTDA direktoru vəzifəsini icra edən Leokadiya Zak deyib.
310,2 min dollar həcmində qrant USTDA-nın Virciniya ştatının Arlinqton şəhərində yerləşən ofisində keçirilən imzalanma mərasimindən sonra təqdim edilib. Zak və administrasiyanın baş direktoru Arif Məmmədov ABŞ və Azərbaycan hökumətləri adından qrant barədə razılaşmaya imza atıblar.
Azərbaycan Dövlət Mülki Aviasiya Administrasiyası "The Wicks Group PLLC of Washington "u ABŞ podratçısı olaraq seçib ki, o da USTDA tərəfindən yönəldilən maliyyənin dəstəyini həyata keçirəcək. Qranta əlavə olaraq "Azərbaycan hava yoları" QSC və "Silk Way Airlines" Azərbaycan şirkətləri texniki dəstək proqramının başa çatması üçün əlavə vəsait ayırıb.
