Azərbaycan ECOBANK-ın səhmdarı olacaq
Azərbaycan, Bakı, 9 fevral /Trend, müxbir İ.Xəlilova/
Azərbaycanın İqtisadi Əməkdaşlıq Təşkilatının (ECO) İnkişaf və Ticarət Bankında (ECOBANK) iştirak payını ödəmək üçün ölkənin dövlət büdcəsindən 2,5 milyon manat ayrılacaq.
Trend-in məlumatına görə, bu məqsədlər üçün xərclər "Beynəlxalq maliyyə-kredit və ictimai-siyasi təşkilatlarda üzvlük haqlarının ödənişinə xərclər" maddəsində nəzərdə tutulub. Bu vəsaitlər Azərbaycan Nazirlət Kabinetinin 2012-ci il 6 fevral tarixli sərəncamı əsasında bölüşdürülüb.
Nizamnamə kapitalı 300 milyon SDR (458,73 milyon dollara yaxın) və elan olunmuş kapitalı bir milyard SDR (1,529 milyard dollara yaxın) olan İqtisadi Əməkdaşlıq Təşkilatının İnkişaf və Ticarət Bankı 2005-ci ildə İran, Pakistan və Türkiyə tərəfindən yaradılıb. Bankın mənzil-qərargahı İstanbulda yerləşir.
Bir ECO-vahid bir SDR-ə uyğun gəlir.
Azərbaycan Prezidenti İlham Əliyev İƏT-in 2010-cu il dekabrın 23-də İstanbulda keçirilən XI sammitində bəyan edib ki, Azərbaycan İƏT-in İnkişaf və Ticarət Bankının tamhüquqlu üzvü olmaqla bağlı Türkiyə Prezidenti Abdullah Gülün dəvətindən istifadə edir.
Bankın Xarici əlaqələr şöbəsinin direktor müavini Tuncay Melektosunun əvvəl Trend-ə verdiyi məlumata görə, Azərbaycan ECO-nun İnkişaf və Ticarət Bankında 15 faizədək iştirak payı ala bilər.
Melektosunun sözlərinə görə, banka yeni üzvlərin qəbulu qaydalarını tənzimləyən sənədə əsasən, hər bir yeni iştirakçının payı 15 faizi ötməməli, eyni zamanda, 0,34 faizdən aşağı olmamalıdır. Azərbaycanın dövlət büdcəsindən ayrılan vəsaitə əsasən, ölkənin bankın nizamnamə kapitalında iştirak payı təxminən 0,7 faiz təşkil edəcək.
"Bankın səhmdarları sırasına yeni iştirakçının daxil edilməsi ilə nizamnamə fondu hazırkı 300 milyon ECO-vahiddən (458,73 milyon dollara yaxın) 580 milyon ECO-vahidədək (886,87 milyon dollara yaxın) artırılacaq", - Melektosun deyib.
Banka daxil olarkən iştirak payına görə minimum üzvlük haqqı iki milyon ECO-vahid (3,058 milyon dollara yaxın) təşkil edir ki, bu da məcmu kapitalın 0,34 faizi qədərdir. Bu zaman 15 faizlik iştirak üçün maksimum üzvlük haqqının mümkün səviyyəsi 87 milyon ECO-vahid (133,031 milyon dollara yaxın) təşkil edir.
Belə olan halda, onun sözlərinə görə, bankın üç yaradıcısı - İran, Pakistan və Türkiyə onların səhmlərinin çoxluq təşkil etmələri üçün hər biri 17,24 faizlik və ya 100 milyon ECO-vahidlik (152,91 milyon dollara yaxın) səhm paketinə malik olacaqlar.
"15 faizlik iştirak payına malik olan ölkə bankın Direktorlar Şurasına öz nümayəndəsini təyin etmək hüququna malikdir. 15 faizdən az iştirak payına malik iştirakçılar isə bir ümumi nümayəndə irəli sürə bilərlər", - Melektosun əvvəl bildirib.
ECO-nun bankında üzv ölkələri Mərkəzi Bank və ya müvafiq nazirlik təmsil edir.
"Bankımızın əsas funksiyaları ticarətin inkişafı, eləcə də iştirakçı ölkələrin iqtisadiyyatının yüksəlməsinə yönələn layihələrin maliyyələşdirilməsidır. Əgər Azərbaycan İƏT bankına daxil olarsa, banklarımız və Azərbaycan bankları arasında imzalayacağımız razılaşmalar çərçivəsində kiçik və orta müəssisələrə və şirkətlərə ortamüddətli maliyyələşdirmə, eləcə də ticarət əməliyyatlarının dəstəklənməsi üçün qısamüddətli maliyyələşdirmə təqdim edəcəyik", - Melektosun bildirib.
İƏT 1985-ci ildə İran, Pakistan və Türkiyə tərəfindən yaradılıb. Təşkilat 1993-cü ildə BMT-də, bir il sonra isə İKT-də müşahidəçi statusu alıb. Əfqanıstan, Azərbaycan, İran, Qazaxıstan, Qırğızıstan, Pakistan, Özbəkistan, Tacikistan, Türkiyə və Türkmənistanın üzv olduğu təşkilatın IX sammiti 2006-cı ilin mayında Bakıda, X sammiti isə 2009-cu ildə Tehranda keçirilib.
Fevralın 9-na olan rəsmi məzənnə 0,7863 AZN/USD təşkil edir.
