Azərbaycan, Bakı, 6 noyabr /Trend, müxbir A.Axundov/
Azərbaycanda xəzinə əməliyyatları bu ilin sonunadək tam avtomatlaşdırılacaq. Bu barədə ölkənin maliyyə nazirinin müavini Azər Bayramov çərşənbə axşamı Bakıda "Pem PAL" proqramı çərçivəsində keçirilən "Dövlət sektorunda uçot siyasəti" adlı beynəlxalq seminarda çıxışı zamanı bildirib.
"Bir neçə il ərzində Azərbaycanda hazırda tamamlanma mərhələsində olan xəzinədarlığın avtomatlaşdırılması üzrə proqram həyata keçiriləcək. Büdcə xərclərinin 90 faizə yaxını bu sistemlə əhatə olunub. Biz yaxın vaxtlarda ölkənin bu avtomalaşdırılmış sistemə tam keçəcəyinə əminik", - Bayramov bildirib.
Onun sözlərinə görə, əməliyyatların icra edilməsinin operativliyini yüksəltməyə, xarici müdaxilələri məhdudlaşdırmağa, əməliyyatların analizi imkanlarını genişləndirməyə imkan verəcək xəzinədarlığın avtomatlaşdırması sistemi bütovlükdə ölkədə "elektron hökumət"in tətbiqi çərçivəsində əhəmiyyətli addımdır.
"Bu, bütün büdcə prosesləri üçün nəzarət mexanizmlərinin - proqnozlaşdırmadan icraya qədər - avtomatlaşdırması yolunda birinci və ən əhəmiyyətli şərtdir", - Bayramov deyib. Onun sözlərinə görə, normativ-hüquqi bazanın hazırlanması üzrə işlər demək olar başa çatıb.
"Bu proses vaxt və səy tələb edir, söhbət 100-ə yaxın əməliyyatın avtomatlaşdırılmasından gedir", - Bayramov bildirib.
Azərbaycanın Nazirlər kabinetinin İqtisadiyyat və maliyyə-kredit siyasəti şöbəsinin rəhbəri Şahin Sadıqovun sözlərinə görə, Azərbaycanda xəzinə sistemi artıq o səviyyəyə çatıb ki, bu təcrübəni artıq başqa ölkələrlə, xüsusilə MDB və Şərqi Avropa ölkələri ilə bölüşmək olar.
