"Azərbaycan və Gürcüstanda kiçik və orta sahibkarlığa və əhaliyə xidmət sahəsində bankların inkişafının Qafqaz təşəbbüsü" layihəsi çərçivəsində mayın 21-dən 28-nə kimi Hannoverdə Beynəlxalq Əməkdaşlıq üzrə Əmanət kassaları Almaniya Fondunda (SBFIC) "Müştərilərə xidmət sistemi" mövzusunda seminar keçiriləcək. SBFIC -in Bakı nümayəndəsi Eduard Şmidtin Trend ə verilən məlumata görə, bu tədbirdə layihənin iştirakçıları olan Azərbaycan və Gürcüstan bankları iştirak edəcəklər.
Bu layihədə Azərbaycanın beş (Parabank, Bank of Baku, "Respublika" bankı, UniBank və Azərdəmiryolbank) və Gürcüstanın iki - TbilUniversalbank və Repablikbank bankları iştirak edirlər.
Onun sözlərinə görə, ilin sonuna kimi 2006-cı il ərzində Bakıda və Tbilisidə daha 2 seminar keçirilməsi planlaşdırılır.
Layihənin birinci mərhələsinin reallaşdırılacağı 3 il ərzində tərəfdaş banklarla SBFIC-in işi beş modul əsasında həyata keçiriləcək. Bu xidmətin keyfiyyətinin yaxşılaşdırılması, bankların əməkdaşlarının ixtisaslaşmasının artırılması, yeni bank məhsullarının tətbiqi (pərakəndə xidmətlərin inkişafı vasitəsilə), Azərbaycan və Gürcüstan bankları arasında əməkdaşlığın inkişafı və bankların gəlirliyinin artırılmasından ibarətdir. Bununla yanaşı, layihə çərçivəsində birgə seminarlar təşkil ediləcək, Almanyiada bank işinin müxtəlif sahələrində təcrübənin öyrənilməsi və s. nəzərdə tutulub.
