Rusiyanın Milli Ehtiyatlar Korporasiyası Azərbaycanda bank müəssisələrinin yaradılmasında iştirak edə bilər. Trend in məlumatına görə, bu barədə "Milli Ehtiyat Bankı" SKB-nın rəhbəri Yuri Kudimov fevralın 21-də bəyan edib.
Onun sözlərinə görə, əgər korporasiyanın fəaliyyəti kifayət qədər fəal olarsa və bank müəssisəsinin onun iştirakı ilə yaradılmasına zərurət yaranarsa, o zaman bu planın həyata keçirməsi mümkündür.
"Bu iştirakın hansı payla və hansı müddətə olacağını isə korporasiyanın ölçüləri və fəallığı müəyyən edəcək. Lakin biz məmnuniyyətlə Azərbaycanda bank açardıq", - deyə bankın rəhbəri bildirib.
Bundan əlavə, bankın nümayəndəsi həmçinin, qeyd edib ki, korporasiya Azərbaycanın Fond bazarında birgə iş planını da nəzərdən keçirir. "Biz yerli bazarla tanışıq və risqlər bizim üçün əlverişli ola bilər", - deyə Y. Kudimov bildirib.
Y.Kudimov həmçinin, Azərbaycan səhmlərinin Rusiya bazarında yerləşdirilməsminin mümkünlüyü barədə də fikir söyləyib. O bəyan edib ki, Azərbaycan müəssisələrinin səhmləri, əgər bu aydın haqq-hesaba və balansa malik olan tanınmış müəssisənin gəlir gətirən səhmlər olarsa, maraq doğura bilər. "Ümumilikdə, yerli müəssisələrin səhmləri bazara yaxşı təqdim olunarsa, kifayət qədər uğurlu ola bilər" - deyə sonda bankın rəhbəri bildirib.
